नगर ः दुष्काळी भागात जनावरांसाठी आवश्‍यक तेथे चारा छावण्या सुरू करण्याचे आदेश सरकारने दिले. छावण्यात आलेल्या प्रती जनावरावर सत्तर रुपये एका दिवसाला खर्च होणार आहे. मात्र सध्याच्या स्थितीचा विचार करता चारा आणि पशुखाद्याचे वाढते दर, पिण्याची पाण्याची कमतरता यात सत्तर रुपयात खर्च भागवायचा कसा, असा प्रश्‍न छावणी सुरू इच्छिणाऱ्यांना पडला आहे.  

राज्यातील अनेक भागात यंदा दुष्काळाची तीव्रता निर्माण झाली आहे. त्यामुळे पशुधन जगवायची चिंता निर्माण झाली. नगर जिल्ह्यामधील सर्वाधिक दुष्काळाच्या झळा बसत असलेल्या शेवगाव, पाथर्डी भागात कार्यकर्त्यांनी पुढाकार घेऊन लोकसहभागातून छावण्या सुरू केल्या आहेत. दोन दिवसांपूर्वी प्रशासनाने जनावरांच्या छावण्या सुरू करण्याबाबत आदेश काढला आहे. जिल्हाधिकाऱ्यांना चारा छावणी सुरू करण्यासाठीचे अधिकार देण्यात आलेले आहेत. एका छावणीमध्ये तीनशे ते पाचशे जनावरे दाखल करून घेतानाच ही संख्या अडीचशेपर्यंत शिथिल करण्याचे अधिकार जिल्हाधिकाऱ्यांना देण्यात आले आहे. चारा छावणीची आवश्‍यकता असलेल्या ठिकाणी जिल्हाधिकाऱ्यांच्या मंजुरीने सहकारी साखर कारखाने, सरकारी खरेदी विक्री संघ, कृषी उत्पन्न बाजार समिती, दूध विक्री संघ यांसारख्या संस्था तसेच सेवा भावी संस्था यांना चारा छावणी उघडण्यात मंजुरी देण्यात येणार आहे.

याआधीही राज्यात दुष्काळी परिस्थितीत छावण्यातून जनावरे जगवली आहेत. यंदाही छावणी चालकाला देण्यात येणारे अनुदान पूर्वीप्रमाणेच म्हणजे मोठ्या जनावरांसाठी सत्तर रुपये तर लहान जनावराला पस्तीस रुपये दिले जाणार आहे. यंदा चाऱ्याची भीषणटंचाई आणि पाणी उपलब्ध करताना छावणी चालकांना कसरत करावी लागणार आहे. 

पशुखाद्याचे दर वाढले यंदा दुष्काळाची दाहकता अधिक जाणवणार आहे. सध्या वाळलेला चारा, कडबा तर उपलब्ध नाहीच, पण उसाचे व हिरव्या चाऱ्याचे तसेच पशुखाद्याचे दर ही सध्या पंचवीस टक्‍क्‍यांनी वाढलेले आहेत. शिवाय जवळपास पाणी उपलब्ध नसल्याने पाणीही दूरवरून आणावे लागणार आहे. त्यामुळे छावणी सुरू करू; पण सत्तर रुपयात खर्च भागवायचा कसा? असा प्रश्‍न छावणी चालकांना पडला आहे. प्रती दिन जनावरांना असा द्यावा लागेल चारा