उस्मानाबाद/ लातूर : औरंगाबाद, जालना, बीड, उस्मानाबाद व लातूर जिल्ह्यांतील १३९ मंडळांत सोमवारी (ता. ५) सकाळपर्यंतच्या चोवीस तासांत पावसाने हलक्या ते मध्यम पावसाने हजेरी लावली. उस्मानाबाद जिल्ह्यातील तुळजापूर, उमरगा तालुक्‍यात मात्र दमदार पाऊस झाला.  

औरंगाबाद जिल्ह्यातील ६५ पैकी ५५ मंडळांत रिमझिम पाऊस झाला. अधूनमधून थोड्या जास्त प्रमाणात बरसणाऱ्या श्रावण सरीचा जोर औरंगाबाद, वैजापूर, कन्नड तालुक्‍ंयात थोडा जास्त राहिला. वैजापूर मंडळात २० मिलिमिटर, नागमठाण २१, लोणी २२, लाडगाव १२, शिवूर १५, चिकलठाणा २१, करंजखेडा १३, देवगाव रंगारी १२, चापानेर १२, नाचनवेल १२, कन्नड १४, बाजारसावंगी १४, अंबाई १८,  बीडकीन १२, फूलंब्री १८, उस्मानपूरा १८, औरंगाबाद १२, तर कांचनवाडीत १२ मिलिमिटर पावसाची नोंद झाली. 

जालना जिल्ह्यातील ४९ मंडळांपैकी भोकरदन, जाफ्राबाद, अंबड तालुक्‍यातील एक मंडळ मिळून १६ मंडळांत १ ते १८ मिलिमिटर दरम्यान पावसाची नोंद झाली. बीड जिल्ह्यातील ६३ मंडळांपैकी आष्टी, पाटोदा, शिरूर कासार, बीड या तालुक्यांतील १४ मंडळांत तुरळक ते हलका पाऊस झाला. १ ते १२ मिलिमीटर दरम्यान पावसाची नोंद या तालुक्‍यांमध्ये झाली. लातूर जिल्ह्यातील ५३ मंडळांपैकी २४ मंडळांत पाऊस झाला. औसा तालुक्‍यातील किल्लारी मंडळात सर्वाधिक ४४ मिलिमिटर पावसाची नोंद झाली. निलंगा तालुक्‍यातील निलंगा मंडळात २७, अंबुलगा बु.२०, कासारशीरसी २५, मदनसुरी १७, औराद श. २८, कासारबालकुंदा येथे २२ मिलिमिटर पाऊस झाला. इतर मंडळात तुरळक ते हलका पाऊस झाला. 

उस्मानाबाद जिल्ह्यातील ४२ मंडळांपैकी ३० मंडळांत पावसाचा जोर अधिक राहिला. तुळजापूर, उमरगा तालुक्‍यांतील मंडळांत अधिक पाऊस झाला. तुळजापूर तालुक्‍यातील तुळजापूर मंडळात १३ मिलिमिटर, सावगाव १७, जळकोट २५, नळदूर्ग ३३, मंगरूळ १९, सालगरा ३२, उमरगा तालुक्‍यातील उमरगा मंडळात सर्वाधिक ६० मिलिमिटर पाऊस झाला. त्यापाठोपाठ मुरूम ४५, मुळज ३५, डाळिंब ३६ लोहारा तालुक्‍यातील लोहारा १०, जेवळी येथे १५ मिलिमिटर पावसाची नोंद झाली. 

ढगांची नुसतीच गर्दी

ढगांच्या प्रमाणात पाऊस पडत नसलेल्या मराठवाड्याच्या औरंगाबादस्थित विभागीय आयुक्‍त कार्यालयाच्या इमारतीवर आता कृत्रिम पावसाच्या प्रयोगासाठी आवश्‍यक रडार रविवारी (ता. ४) बसविण्यात आले. त्यामुळे आता कृत्रिम पावसाचा प्रयोग कधी सुरू होणार, याकडे शेतकऱ्यांचे लक्ष आहे.