अमरावती : राज्य शासनाने केलेल्या करारानुसार इफ्को टोकियो जनरल इन्शुरन्स कंपनीचे कार्यालय येथे कार्यान्वित नसल्याचे कृषिमंत्री दादा भुसे यांच्या दौऱ्यात निदर्शनास आले. त्यामुळे या कराराचा भंग झाला असून, कंपनीविरुद्ध जिल्हा अधीक्षक कृषी अधिकारी विजय चवाळे यांनी दिलेल्या तक्रारीवरून येथील गाडगेनगर पोलीस ठाण्यात गुन्हा दाखल करण्यात आला.

कंपनीचा टोल फ्री क्रमांक लागत नाही व कंपनीचे प्रतिनिधी उपलब्ध होत नाहीत, अशी तक्रार कृषिमंत्री दादा भुसे यांना अमरावती दौऱ्यात प्राप्त झाली. त्यानुसार त्यांनी या कंपनीच्या कार्यालयाची प्रत्यक्ष तपासणी केली. जिल्हाधिकारी पवनीत कौर यांच्यासह इतर अधिकारी या वेळी उपस्थित होते. कंपनीचे कार्यालय सुस्थितीत कार्यान्वित न झाल्याचे तपासणीत आढळले. त्यामुळे या कंपनीने खरीप व रब्बी हंगामासाठी शासनासोबत केलेल्या कराराचे उल्लंघन केले असून, याबाबत तक्रार दाखल करण्याचे निर्देश कृषिमंत्र्यांनी या वेळी दिले. त्यानुसार जिल्हा अधीक्षक कृषी अधिकारी विजय चवाळे यांनी गाडगेनगर पोलिस ठाण्यात तक्रार दाखल केली. 

पीकविमा योजनेत जिल्ह्यातील १ लाख ७२ हजार ६५५ शेतकरी सहभागी आहेत. या कंपनीने तत्काळ जिल्हा व तालुका स्तरावर प्रतिनिधी तत्काळ नेमून नुकसानग्रस्तांना पीक विमा मिळवून देण्यासाठी कार्यवाही करण्याचे निर्देश जिल्हाधिकारी पवनीत कौर यांनी दिले आहेत. पीकविमा योजनेत सहभागी शेतकरी बांधवांनी नुकसान झाल्यास ७२ तासांच्या माहिती कंपनीला माहिती द्यावी. संपर्कात अडथळे येत असतील तसे कृषी कार्यालय, तहसील कार्यालयाला कळवावे, असे आवाहन करण्यात आले आहे. त्याबाबत सर्व कार्यालयांना सूचना देण्यात आल्या आहेत.