नगर ः दुष्काळी परिस्थितीत शेततळ्याच्या पाण्यावर शेती, फळबागा जगवता आल्याचा गेल्या दहा वर्षांचा अनुभव पाहून गेल्या पाच वर्षांत नगर जिल्ह्यात तब्बल ५६ हजार शेतकऱ्यांनी ‘मागेल त्याला शेततळे’ योजनेतून शेततळे करण्यासाठी अनुदान मागणी केली. मात्र, कोरोना संकटामुळे या योजनेतून नवीन कामे सुरू करणे गेल्या पाच महिन्यांपासून बंद आहेत. मागणी केलेल्या पैकी आत्तापर्यंत पाच वर्षांत सतरा हजार शेततळ्यांची कामे पूर्ण झाली आहेत. कृषी विभागाने पात्र ठरवलेल्या सुमारे तीस हजार शेतकऱ्यांना शेततळ्याची कामे सुरू होण्याची प्रतीक्षा आहे.

दरम्यान यंदा कोरोना संकटामुळे मागणीच्या ३३ टक्केच निधी मिळणार असल्याने नवीन कामे सुरू करू नये या बाबत वरिष्ठांचे आदेश असल्याने अजून काही महिने तरी शेतकऱ्यांना शेततळ्याची कामे पूर्ण करण्यासाठी प्रतीक्षा करावी लागणार आहे. दुष्काळी परिस्थितीत कमी पाण्यात पीक जगवण्याचा प्रयोग शेततळ्याच्या माध्यमातून सुरू झाला. नगर जिल्ह्यात गेल्या दहा वर्षांत तब्बल पाच ते सहा वेळा दुष्काळी परस्थितीला सामोरे जावे लागले. मात्र, अशा दुष्काळी परिस्थिती शेततळ्याने अनेक शेतकऱ्यांच्या फळबागा वाचल्या.

अनेक शेतकरी शेततळ्याच्या पाण्यावर भाजीपाला पिके घेण्यातही यशस्वी झाले. त्यामुळे गेल्या पाच वर्षांत शेततळ्याचा लाभ मिळण्यासाठी तब्बल ५६ हजार १३४ शेतकऱ्यांनी अनुदान मिळावे म्हणून कृषी विभागाकडे मागणी केली. त्यातील आत्तापर्यंत सतरा हजार शेततळ्याची कामे पूर्ण झाली. आत्तापर्यंत शेततळ्यावर ६८ कोटी १२ लाखांचा खर्च झालेला आहे. अजूनही तीन हजार शेततळ्याचे अनुदान देणे बाकी आहे.

शेततळे कमी पाण्यात शेती करण्यासाठी आणि संकटाच्या काळात महत्त्वाचे आहे. त्यामुळे मागणी करणारे शेतकरी अनेक आहेत. शासनाने किमान शेतकऱ्यांच्या वैयक्तिक लाभाच्या योजनांचा निधी कमी करू नये आणि नवीन कामे सुरू करावीत. - बाळासाहेब पटारे, विभागीय अध्यक्ष, शेतकरी संघटना