येवला, जि. नाशिक  : खरीप हंगामाचा श्रीगणेशा करण्यासाठी आभाळाकडे आशाळभूतपणे नजरा लावून बसलेल्या येवला तालुक्यातील शेतकऱ्यांचे शेतीचक्र तालुक्यातील दमदार पावसामुळे पुढे सरकणार आहे. मृग नक्षत्राने शेवटच्या तीन दिवसांत थोडाफार दिलासा दिल्यानंतर ''आर्द्रा'' नक्षत्राच्या दमदार पर्जन्यधारा बरसल्याने तालुक्यातील बळिराजाच्या आशा पल्लवित झाल्या असून, यंदाच्या खरिपाच्या पेरणीसाठी तालुक्यातील शेतकऱ्यांचा सर्वाधिक कल हा पिवळे सोने समजल्या जाणाऱ्या मकाकडे दिसत आहे.

तालुक्यातील बी-बियाणे विक्रीची सर्वच दुकाने गेल्या चार ते पाच दिवसांत गजबजून गेली आहेत.  बियाणे खरेदीच्या अंदाजानुसार, यंदाच्या खरिपाच्या पेरणीसाठी तालुक्यातील शेतकऱ्यांचा सर्वाधिक कल मकाकडे आहे. गेल्या वर्षी खरीप हंगामामध्ये पेरणीसाठी सर्वाधिक मागणी असलेल्या कपाशीला बोंड अळीच्या भीतीमुळे यंदा फटका बसल्याचे दिसत आहे. मागणी घटल्याने यंदा कपाशी तिसऱ्या स्थानावर फेकली गेली आहे.

यंदाच्या खरिपासाठी कपाशीची पीछेहाट होताना मक्याने बाजी मारली आहे. गेल्या वर्षी मकास स्थिर बाजारभाव होता. त्यामुळे  शेतकऱ्यांचा यंदाच्या हंगामात मका लागवडीकडे अधिक कल दिसत आहे. त्यापाठोपाठ शेतकऱ्यांची सोयाबीन बियाण्याला मागणी आहे. बियाणे खरेदीबाबत कपाशी तिसऱ्या स्थानी असून, त्यानंतर शेतकऱ्यांची मूग, उडीद, तूर व बाजरीला मागणी आहे.