नांदेड : शेतकऱ्यांनी येत्या खरीप हंगामासाठी खते, बि-बियाणे, कीटकनाशके आदी निविष्ठांची खरेदी केल्यानंतर संबंधित विक्रेत्याकडून संपूर्ण विवरणासह बिल पावती घ्यावी, असे आवाहन कृषी विभागातर्फे करण्यात आले. 

बनावट, बोगस निविष्ठामुळे होणारे आर्थिक नुकसान टाळण्यासाठी शेतकऱ्यांनी खते, बि, बियाणे, किटकनाशके खरेदी करताना दक्षता घेणे गरजेचे आहे. त्यादृष्टीने गुणवत्ता व चांगल्या दर्जाची हमी देणाऱ्या अधिकृत कृषी निविष्ठा विक्रेत्याकडूनच खरेदी करावी. भेसळीची शंका दूर करण्यासाठी सीलबंद, वेष्टनातील, लेबल असलेले बियाणे खरेदी करावे. वैध मुदतीची खात्री करावी. पिशवीवर नमूद एमआरपी दरापेक्षा जास्त दराने खरेदी करू नये. खरेदी केलेल्या बियाण्यांचे पीक, वाण, लॉट नंबर, वजन, बियाणे उत्पादक कंपनीचे नाव, किमान किंमत, खरेदीदाराचे संपूर्ण नाव, पत्ता, विक्रेत्याचे नाव व सही असलेली रोख अथवा उधारीची पावती घ्यावी. 

ही पावती तसेच वेष्टन बॅग, त्यावरील लेबल तसेच त्यातील थोडे बियाणे हे घटक पिकाची कापणी होईपर्यंत जपून ठेवावे. काही शंका असल्यास कृषी विभागाशी संपर्क साधावा, असे धर्माबाद येथील तालूका कृषी अधिकारी माधुरी उदावंत, पंचायत समितीचे कृषी अधिकारी विश्वास अधापूरे यांनी केले.