मालेगाव, जि. वाशिम : समृद्धी महामार्गासाठी  तालुक्यातील  ४ गावांतील जमिनीचे  भूसंपादन पोलीस  बंदोबस्तात आज (ता. ७)  करण्यात आले. वारन्गीत  शेतकऱ्यांनी अंगावरील कपडे काढून आंदोलन केले. चारही गावात शेतकऱ्यांनी भूसंपादनाला विरोध केला.

जेसीबी मशीन यांच्यासह समृद्धी महामार्गाचे अधिकारी वारन्गी शिवारात भूसंपादन करण्यासाठी आले. त्यावेळीं उपविभागीय अधिकारी राऊत, पोलीस उपअधीक्षक बनसोड, तहसीलदार आर. ए. काळे यांच्यासह मंडळ अधिकारी; तलाठी यांच्यासह पोलीस कर्मचारी आले होते. शेतकऱ्यांनी कपडे काढून तहसीलदारांना भेट देण्याचा प्रयत्न केला. त्यांनी न घेतल्याने ते समृद्धी महामार्गाच्या अधिकाऱ्यांना देण्यात आले. शेतकऱ्यांनी अर्धनग्न आंदोलन केले.