नाशिक  : नदीशेजारील जमिनीवर अतिक्रमणे, अवैध वाळूउपसा आणि पर्यावरण असंतुलन व प्रदूषणासह नदीत घाण व कचरा टाकला जात असल्याने निफाड येथील विनता नदीचे अस्तित्व धोक्यात आले. या नदीच्या स्वच्छता व संवर्धनाकडे लक्ष देणे गरजेचे आहे. यासाठी प्राधान्याने ''विनता'' नदीचे सीमांकन करा, अन्यथा भविष्यात विनता नदीचे अस्तित्व दिसणार नाही, असा इशारा जलतज्ज्ञ डॉ. राजेंद्र सिंह यांनी दिला.  निफाड नगरपंचायत व ग्रामस्थ यांच्या संयुक्त विद्यमाने ''विनता-कादवा नदी स्वच्छता व जलसंवर्धन अभियाना''साठी निफाड येथील रोपवाटिकेमध्ये मंगळवार (ता. १०) मुक्तसंवाद कार्यक्रम आयोजित करण्यात आला होता. या वेळी डॉ. सिंह बोलत होते. कार्यक्रमाचे प्रास्ताविक वि. दा. व्यवहारे यांनी केले. वनपरिक्षेत्र अधिकारी संजय भंडारी, डॉ. सीमा डेर्ले, राजाभाऊ शेलार, राजेंद्र राठी, शिवाजी ढेपले, अॅड. दिलीप वाघावकर, डॉ. उत्तम डेर्ले, गोपाळ पाटील, अनिल कुंदे आदी उपस्थित होते.  या वेळी डॉ. सिंह म्हणाले, ‘‘नदीच्या जमिनीचे सीमांकन करणे ही आजची प्राथमिकता आहे. नदीचा नकाशा पाहून हे करण्यासाठी पाच लोकांची समिती तयार करावी, तीन महिन्यांत हे काम आधी हाती घेऊन शाळा-कॉलेजच्या विद्यार्थ्यांना ''आये कादवा विनता को जाने'' या उपक्रमात सहभागी करावे असे त्यांनी सांगितले.