पुणे : नैर्ऋत्य मोसमी वाऱ्यांनी (मॉन्सून) परतीच्या प्रवासाला वेग घेत निम्म्या महाराष्ट्रातून माघार घेतली आहे. राज्याच्या अनेक भागांत पावसाने उघडीप दिली असून, आज (ता. १४) बहुतांशी भागांत हवामान मुख्यत: कोरडे राहण्याची शक्यता आहे. दक्षिण कोकणात तुरळक ठिकाणी विजांसह पावसाचा अंदाज हवामान विभागाने वर्तविला आहे. 

बंगालच्या उपसागरात समुद्र सपाटीपासून ५.८ किलोमीटर उंचीवर चक्राकार वाऱ्यांची स्थिती आहे. आज (ता. १४) या भागात कमी दाब क्षेत्राची निर्मिती होण्याचे संकेत आहेत. उद्या (ता. १५) ही प्रणाली ओडिशा आणि आंध्र प्रदेशच्या किनाऱ्याकडे येण्याची शक्यता वर्तविण्यात आली आहे. अरबी समुद्रात कर्नाटकच्या किनाऱ्यालगत चक्राकार वाऱ्यांची स्थिती आहे. त्यापासून तेलंगणापर्यंत एक आणि बंगालच्या उपसागरापर्यंतील चक्राकार वाऱ्यांच्या स्थितीपर्यंत एक कमी दाबाचा पट्टा सक्रिय आहे. त्यामुळे दक्षिण भारतातील राज्यात जोरदार पावसाची शक्यता आहे. 

महाराष्ट्राच्या आणखी काही भागांतून माघार शक्य नैर्ऋत्य मोसमी वाऱ्यांनी संपूर्ण विदर्भासह उत्तर महाराष्ट्र, मराठवाड्याच्या काही भागासह निम्म्या महाराष्ट्रातून माघार घेतली आहे. देशाच्या बहुतांश भागातून मॉन्सून परतला असून, महाराष्ट्राचा आणखी काही भाग, तेलंगणा आणि कर्नाटकच्या काही भागांतून आज (ता. १४) मॉन्सून परतण्यास पोषक हवामान असल्याचे हवामान विभागाने स्पष्ट केले आहे.

विजांसह पावसाची शक्यता  कोकण : रत्नागिरी, सिंधुदुर्ग.