पुणे  : पावसाने दडी मारल्याने पुणे विभागात पाणीटंचाई वाढू लागली आहे. पुणे, सातारा जिल्ह्यांतील दुष्काळी भागातील पाच तालुक्यांमधील २१ गावे, १७७ वाड्यांना पाणीटंचाईच्या झळा बसत असून, सुमारे ३५ हजार नागरिकांची तहान भागविण्यासाठी २० टॅंकर धावत असल्याचे पुणे विभागीय आयुक्त कार्यालयातर्फे सांगण्यात आले. उन्हाचा चटका वाढताच या भागातील पाणीटंचाई आणखी वाढणार आहे.

यंदाचा पावसाळा शेवटच्या टप्प्यात आला असून, लवकरच मॉन्सूनचा परतीचा प्रवास सुरू होणार आहे. यंदा पुणे, सातारा जिल्ह्याच्या पूर्व भागासह सोलापूर, सांगली जिल्ह्यांतील अनेक भागांत पावसाने दडी मारली आहे. त्यामुळे भूजलपातळी खालावली असून, पिण्याच्या पाण्याचे स्रोत कोरडे पडू लागले आहेत. भर पावसाळ्यातही अनेक भागांत टंचाईग्रस्त भागाला टॅंकरने पाणीपुरवठा करावा लागला. आता पावसाळा संपल्यानंतर या भागात पाणीटंचाई तीव्र होणार आहे.

पुणे जिल्ह्यातील बारामती, दौंड आणि पुरंदर तालुक्यांमधील १२ गावे, ६६ वाड्यांमध्ये पाणीटंचाई वाढल्याने सुमारे १४ हजार नागरिकांना ८ टॅंकरद्वारे पिण्याचे पाणी पुरवण्यात येत आहे. साताऱ्यातील खटाव आणि माण या तालुक्यांमधील १५ गावे, ६९ वाड्यांमधील २१ हजार नागरिकांना १२ टॅंकरने पाणीपुरवठा करण्यात येत आहे. सांगली, सोलापूर, कोल्हापूर जिल्ह्यांत पाणीटंचाई भासत नसली तरी पावसाने ओढ दिलेल्या भागात पुढील काळात पाणीटंचाई वाढण्याची शक्यता आहे.