नगर ः राज्यामध्ये हमीदराने मका खरेदी करण्यासाठी शासनाने खरेदी केंद्र सुरू केलेले आहेत. त्याची मुदत रविवारी (ता. ३१) संपत असल्याने ते खरेदी केंद्रे बंद करण्यात येणार आहेत. मात्र शेतकऱ्यांकडे अजून मोठ्या प्रमाणात मका शिल्लक आहे. त्यामुळे मका खरेदी केंद्राला मुदवाढ मिळावी, अशी मागणी शेतकरी नेते धनंजय धोर्डे पाटील यांनी मुख्यमंत्री देवेंद्र फडणवीस यांच्याकडे निवेदन देऊन केली आहे.  मुख्यमंत्री सोमवारी (ता. १) शनिशिंगणापूर येथे आले होते. त्या वेळी धोर्डे यांनी त्यांना निवदेन दिले. त्यात म्हटले आहे, की राज्यामध्ये अनेक ठिकाणी हमीदराने मक्‍याची खरेदी करण्यासाठी खरेदीकेंद्रे सुरू आहेत. त्याची मुदत ३१ डिसेंबरला संपली. मात्र बहुतांश ठिकाणी मक्‍याचे खळे करण्याचे काम नोव्हेंबर, डिसेंबर किंवा जानेवारीपर्यंतही चालते. खळे केल्यावर साधारण आठ ते दहा दिवस मका वाळण्याला लागतात. अनेक ठिकाणी अजूनही मका काढणे बाकी आहे. त्यामुळे ही खरेदी केंद्रे सुुरू राहणे गरजेचे आहे. त्यामुळे सुरू असलेल्या मका खरेदी केंद्राला मुदतवाढ देऊन मका साठवणीसाठी गोदाम उपलब्ध करून द्यावेत, अशी मागणी धोर्डे यांनी केली आहे.