कोल्हापूर : केंद्र सरकारने साखरेचा किमान दर वाढवल्यास उसाची एफआरपी १० रिकव्हरी बेसला २७५० वरून तो वाढवून १० रिकव्हरी बेसला ३००० रुपये करावी, अशी मागणी आंदोलन अंकुश संघटनेचे धनाजी चुडमुंगे यांनी केली आहे.

पत्रकात म्हंटले आहे की, साखरेचा किमान दर ३१०० वरून ३५०० रुपये करण्याची मागणी साखर कारखान्यांची संघटना करत आहे. केंद्र सरकार ही अशी वाढ करण्याच्या विचारात आहे. साखरेचा किमान दर २९०० वरून ३१०० केला गेला त्यावेळी या कारखान्यांनी उसाचा दर एफआरपी प्रमाणेच दिला. वाढलेल्या साखर दराचा फायदा कारखान्यांनी स्वत्ताकडे ठेवला. आता जर हा दर ३१०० वरून ३५०० रुपये केला तर बाजारातील साखरेचा दर ४० रुपयाच्या पुढे जाणार आहे. या वाढलेल्या दराचा फायदा कारखाने शेतकऱ्यांना देणार नाहीत. उसाचा वाढलेला उत्पादन खर्च आणि उसाचे घटलेले एकरी उत्पादन त्याचबरोबर वाढता तोडणी वाहतूक खर्च व कारखान्यांची घटलेली रिकव्हरी याचा विचार करून राज्य शासनाने उसाची एफआरपी वाढवण्याची शिफारस केंद्राकडे करावी. सरकारने ग्राहक, शेतकरी आणि कारखानदार यांचा समतोल विचार करून निर्णय घ्यावा.