नाशिक : जुलैच्या सुरवातीला जिल्ह्यात अनेक ठिकाणी दमदार पावसाचे आगमन झाले. तर काही भागांत पावसाने अक्षरशः झोडपून काढले आहे. तरी जिल्हाभर म्हणावा तसा समाधानकारक पाऊस झालेला नाही. तरी झालेल्या पावसाचा आधार झाला असून, गुरुवार (ता. ११) अखेरीस टँकरच्या संख्येत घट झाल्याचे चित्र आहे. गत महिन्यात २५ जूनअखेर सर्वाधिक १२७८ गावे वाड्यांसाठी ३९७ टँकर सुरू होते. त्यात घट झाली असून, सध्या ९०१ गावे - वाड्यांची तहान टँकरवरच अवलंबून आहे. परिणामी, जिल्ह्यात २७९ टँकर सुरू आहेत. त्यामध्ये येवला तालुक्यात सर्वाधिक ६१ टँकर अजूनही सुरू आहेत. दुष्काळाने चालू वर्षी नागरिकांचे चांगलेच हाल झाले. त्यात जनावरे सांभाळताना अनेकांना कसरत करावी लागली. अनेक ठिकाणी पाण्याचे स्रोत आटल्याने बहुतांश तालुक्यांमध्ये टँकरने पाणीपुरवठा करण्याची वेळ प्रशासनावर आली होती. त्यात पावसाचे उशिरा आगमन झाल्याने अडचणी वाढल्या होत्या. मात्र नाशिक, त्र्यंबकेश्‍वर, इगतपुरी, दिंडोरी, पेठ आणि सुरगाणा तालुक्यांना या पावसाने अक्षरश: झोडपून काढले आहे. तर येवला, नांदगाव, मालेगाव, बागलाण, सिन्नर, चांदवड, मालेगाव आदी तालुक्यांमध्ये पावसाने आवश्यक हजेरी लावलेली नाही. परिणामी, तालुक्यांमध्ये टँकरने पाणीपुरवठा करावा लागत आहे. दरम्यान, आदिवासी पट्ट्यात टँकर बंद झाले असून, नांदगाव तालुक्यातील टँकरची संख्या निम्म्यावर आल्याने आशादायी चित्र निर्माण झाले आहे. 

तुलनात्मक टँकरची स्थिती