नाशिक : ऑक्टोबर महिन्यातील पावसामुळे जिल्ह्यातील शेतीपिकांच्या नुकसानीचे पंचनामे प्रशासनाने पूर्ण केले. सुमारे दोन हजार गावांमधील तब्बल साडेसहा लाख हेक्टरवरील पिकांचे नुकसान झाल्याची माहिती समोर आली आहे. यात जिरायती क्षेत्राची ९७ टक्के हानी झाली आहे. मका, सोयाबीन, बाजरी, द्राक्ष आणि कांद्याला सर्वाधिक फटका बसला आहे. तब्बल सात लाख ७६ हजार ९७० शेतकरी बाधित झाले आहेत. प्रशासनाच्या आढाव्यात सव्वातीन लाख हेक्टरचे प्राथमिक नुकसान झाल्याचे समोर आले होते. प्रत्यक्षात मात्र, हे नुकसान दुप्पट असल्याचे स्पष्ट झाले. नुकसानीचा अहवाल शासनाकडे पाठविण्यात आला असून आता शेतकऱ्यांचे डोळे मदतीकडे लागून आहेत.

जिल्हा प्रशासनाने कृषी व इतर यंत्रणांच्या सहाय्याने जिल्ह्यातील पंचनाम्यांची कामे हाती घेतली. परंतु, बहुतांश शेतांमध्ये दोन ते तीन दिवस पाणी साचून असल्याने प्रशासनाला पंचनामे करताना अडचणी आल्या. त्यामुळे या हंगामातील परिणाम रब्बी हंगामावर होण्याची दाट शक्यता आहे. 

भरपाईसाठी ६३६ कोटींची मागणी

जिल्हा प्रशासनाने पंचनाम्यांचा अहवाल राज्य स्तरावर सादर केला. राज्यात राष्ट्रपती राजवट लागू असल्याने राज्यपालांनी नियुक्‍त केलेल्या सल्लागार मंडळाच्या हाती राज्याचा कारभार असणार आहे. परिणामी, नुकसानभरपाईबाबत प्रश्‍नचिन्ह उभे ठाकले आहे. मात्र, हा पाऊस नैसर्गिक आपत्ती असून, शेतकऱ्यांना त्वरित मदत देण्यासाठीची शिफारस राज्यपालांकडे करू शकते. त्यामुळे बाधित शेतकऱ्यांना मदत मिळण्यात तूर्तास कोणतीही अडचण नसल्याची माहिती प्रशासनाने दिली. 

जिल्ह्यातील एकूण नुकसान