राहुरी विद्यापीठ, जि. नगर: महात्मा फुले कृषी विद्यापीठासह राज्यातील सर्व कृषी विद्यापीठाच्या कर्मचाऱ्यांना लवकरात लवकर राज्यातील सर्व शासकीय कर्मचाऱ्यांप्रमाणे सातवा वेतन आयोग लागू करण्याबाबत महात्मा फुले कृषी विद्यापीठ कर्मचारी समन्वय संघाने आग्रही भूमिका घेतली असून, याबाबतचे निवेदन व माहिती राज्याचे कृषिमंत्री दादाजी भुसे यांना दिली. मंत्री भुसे यांनीही तातडीने लक्ष घालून महिनाअखेरपर्यंत विद्यापीठाच्या कर्मचाऱ्यांना सातवा वेतन आयोग लागू होईल, अशी माहिती दिली.  या वेळी समन्वय संघाचे अध्यक्ष डॉ. चिंतामणी देवकर, मार्गदर्शक मच्छिंद्र बेल्हेकर, सचिव मच्छिंद्र बाचकर उपस्थित होते. राज्य शासकीय कर्मचारी व अकृषी विद्यापीठ सेवेतील कर्मचाऱ्यांप्रमाणे या कृषी विद्यापीठातील सातव्या वेतन आयोगासोबतच कर्मचाऱ्यांना सेवांतर्गत आश्‍वासित प्रगती योजना तसेच सुधारित सेवांतर्गत आश्‍वासित प्रगती योजना अद्याप लागू झालेली नाही, त्यामुळे विद्यापीठातील कर्मचाऱ्यांना आर्थिक फटका बसत आहे.