लोहगाव, जि. औरंगाबाद :  परिसरात गुरूवारी (ता.३) रात्री पुर्वा नक्षत्राचा पाऊस  वादळी वाऱ्यासह तासभर पडला. त्यामुळे शेकडो एकर ऊस, केळी, बाजरी, कापूस, पिके जमिनीवर आडवी झाली. परिणामी, शेतकऱ्यांचे नुकसान झाले.

रात्री साडेआठ वाजेदम्यान अचानक विजांच्या गडगडाटात जोरदार चक्री वादळासह तासभरात ४० मिलीमीटर  पाऊस पडला. पावसाने लोहगाव, ब्रम्हगव्हान, मावसगव्हान, लामगव्हान, जोगेश्वरी, मुलानीवाडगाव, शेवता, विजयपूर, तारूपिपंळवाडी, अमरापूरवाघुडी, ढाकेफळ, ७४ जळगाव, शिवारातील ऊस पिके बेटासह, तर केळी, झाडे, विद्युत पोल, कापूस, बाजरी, पिके उन्मळून आडवी झाली. त्यामुळे शेतकऱ्यांचे मोठे नुकसान झाले.

या पीक नुकसानीचे तात्काळ पंचनामे करून शेतकऱ्यांना नुकसान भरपाई देण्यात यावी, अशी मागणी अन्नदाता शेतकरी संघटनेचे प्रमुख जयाजी सुर्यवंशी, शेतकरी नजीर सय्यद, रमेश मिसाळ, अंकुश बोरूडे, बबन तेजिनकर, आदीनी केली.