नांदेड : नांदेड, परभणी, हिंगोली जिल्ह्यातील अनेक मंडळांत मंगळवारी (ता.२८) दुपारी दोन ते चारच्या दरम्यान वादळी वाऱ्यासह मॉन्सूनपूर्व पाऊस झाला. यावेळी झालेल्या गारपीटीमुळे शिजवून वाळवत ठेवलेली हळद, केळी, भाजीपाला, फळपीकांचे मोठे नुकसान झाले. 

नांदेड जिल्ह्यातील अर्धापूर तालुक्यात मंगळवारी दुपारी दोन वाजेनंतर वादळी वाऱ्यासह गारपीट झाली. अर्धापूर मंडळात १० मिलीमीटर पावसाची नोंद झाली. हिंगोली जिल्ह्यातील वसमत तालुक्यातील कुरुंदा, गिरगाव, कुरुंदवाडी, भेंडेगाव आदी गावांत वादळी वाऱ्यासह पाऊस, गारपीट झाली. 

परभणी जिल्ह्यातील पूर्णा, परभणी तालुक्यातील अनेक गावांत हलका पाऊस झाला. सध्या या तीन जिल्ह्यात हळद शिजविणे, वाळवणे, पॉलिसिंगची कामे सुरु आहेत. पावसामुळे हळद झाकून ठेवताना शेतकऱ्यांची तारांबळ उडाली. वादळामुळे केळीची पाने फाटून झिरमाळ्या झाल्या. आंबा तसेच अन्य फळपिके, भाजीपाला पिकांनाही गारपीटीचा तडाखा बसला.