पुणे : जिल्ह्यात शुक्रवारी (ता. ८) सलग दुसऱ्या दिवशी अवकाळी पावसाचा फटका पिकांना बसला आहे. यामध्ये प्रामुख्याने द्राक्ष, आंबा या नगदी पिकांसह रब्बीच्या ज्वारी, बाजरी आणि भाजीपाला पिकांचा समावेश आहे. काढणीसाठी तयार असलेल्या द्राक्षबागांना पावसाच्या फटक्यामुळे नुकसानीला सामोरे जावे लागले आहे. मोहोरात आणि फळधारणेच्या अवस्थेत असलेल्या आंब्याला मोठा फटका बसला आहे. उत्तर पुणे जिल्ह्याला पावसाचा मोठा फटका पिकांना बसला आहे. तुलनेत बारामती, इंदापूर, दौंड, पुरंदर तालुक्यांता पाऊस कमी झाला आहे. उत्तर पुणे जिल्‍ह्यात जुन्नर खेड, आंबेगाव, शिरुर तालुक्याला गुरुवारी (ता. ७) सायंकाळी वादळी पाऊस झाला. या पावसाने नारायणगाव, ओतूर, आळेफाटा परिसरातील पिकांना मोठा फटका बसला असून, शेतकऱ्यांचे मोठ्या प्रमाणात नुकसान झाले आहे. कांदा पिकामध्ये पाणी साठल्यामुळे सडण्याचा धोका निर्माण झाला आहे. तर उगवलेल्या कांद्यावर मावा, भुरी, करपा या रोगांचा प्रादुर्भाव वाढण्याची धोका निर्माण झाला आहे. गव्हावर मावा, तुडतुडा, तांबेरा या रोगाचा प्रादुर्भाव वाढणार असून, पावसाचे पाणी शेतात साठल्यामुळे गहू व इतर सर्वच पिकांचे ही थोडे कमी अधिक प्रमाणात नुकसान होणार आहे. सातगाव पठार (ता. आंबेगाव) भागात गुरुवारी (ता. ७) रात्री सुमारे दोन तास मुसळधार पावसाने हजेरी लावली. त्यानंतर रात्रभर तुरळक पाऊस पडल्यानंतर पुन्हा शुक्रवारी पहाटे पेठ परिसरात अर्धा तास जोरदार पाऊस पडला. या जोरदार झालेल्या पावसाने बहुतांशी शेतात उभे असलेले ज्वारीचे पीक भुईसपाट झाले आहे. उत्पादनात घट येणार असल्याने पुन्हा एकदा शेतकऱ्यांमध्ये चिंतेचे वातावरण निर्माण झाले आहे. पावसाने पीक भुईसपाट झाले आहे. जनावरांच्या खायला वापरला जाणारा कडबा पावसाने भिजणार आहे.

शुक्रवारी (ता. ८) सकाळी आठ वाजेपर्यंत धरणांच्या पाणलोटनिहाय झालेला पाऊस, मिलिमीटरमध्ये