परभणी ः परभणी जिल्ह्यात अस्तित्वात असलेल्या महसूल मंडळे आणि तलाठी सजांची फेररचना करण्यात आली आहे. नवीन महसूल मंडळे आणि तलाठी सजांच्या निर्मितीमुळे जिल्ह्यातील एकूण महसूल मंडळाची संख्या ५२ आणि तलाठी सजांची संख्या ३१३ झाली आहे.
तलाठी सजा पुनर्रचना समितीच्या अहवालाच्या अनुषंगाने मंत्रिमंडळ उपसमितीने केलेल्या शिफारशीनुसार जिल्ह्यात नवीन महसुली मंडळाची निर्मिती करण्यात आली आहे. जिल्हाधिकारी पी. शिवशंकर यांनी महसूल मंडळे आणि तलाठी सजांची फेरचना अंतिम केली आहे.
पूर्वी जिल्ह्यातील ९ तालुक्यात एकूण ३९ महसूल मंडळे आणि २३७ तलाठी साझा होते. फेररचनेनंतर नवीन १३ महसूल मंडळे आणि ७६ तलाठी सजांची भर पडल्यामुळे आता जिल्ह्यातील महसूल मंडळाची संख्या ५२ आणि तलाठी सजांची संख्या ३१३ झाली आहे.
नव्याने अस्तित्वात आलेली तालुकानिहाय महसूल मंडळे ः परभणी तालुकाः टाकळी कुंभकर्ण, जिंतूर तालुकाः दुधगाव, वाघी धानोरा, सेलू तालुका ःमोरेगाव, मानवत तालुका ः ताडबोरगाव, रामपुरी बुद्रुक, पाथरी ः कासापुरी, सोनपेठ तालुका ः शेळगाव, वडगाव, गंगाखेड तालुका ः पिंपळदरी, पालम तालुका ः पेठशिवणी, रावराजूर, पूर्णा तालुका ः कावलगाव.