परभणी : ‘‘मानवत येथील भारतीय कापूस महामंडळाच्या (सीसीआय) खरेदी केंद्रावर गुरूवारी (ता.३०) कापूस खरेदी सुरु झाली आहे. शनिवारी (ता.२) जिंतूर येथे कापूस खरेदी सुरु होईल. पणन महासंघ आणि ‘सीसीआय’च्या उर्वरित केंद्रांवर सोमवार (ता.४) पासून कापूस खरेदी सुरु होईल’’, अशी माहिती जिल्हा उपनिबंधक (सहकारी संस्था) मंगेश सुरवसे यांनी दिली. 

जिंतूर, सेलू, मानवत, सोनपेठ, पूर्णा, ताडकळस या ठिकाणी ‘सीसीआय’ची तर, परभणी, पाथरी, गंगाखेड या ठिकाणी राज्य सहकारी कापूस उत्पादक पणन महासंघाची खरेदी केंद्रे आहेत. या केंद्रावर कापूस विक्रीसाठी जिल्ह्यातील १० कृषी उत्पन्न बाजार समित्यांतर्गंतच्या एकूण ४६ हजार ७७६ शेतकऱ्यांनी नोंदणी केली. या शेतकऱ्यांकडे साडेचार लाख ते पाच लाख क्विंटल कापूस शिल्लक आहे. लॉकडाउनमुळे ‘सोशल डिस्टन्सिंग’चे पालन करुन कापूस खरेदी सुरु करण्यात आली. 

मानवत येथील ‘सीसीआय’च्या केंद्रावर गुरूवारी ४० वाहनांमधून आणलेल्या कापसाची खरेदी करण्यात आली. शनिवारी जिंतूर येथे खरेदी सुरु होईल. ‘सीसीआय’च्या उर्वरित केंद्रांवर सोमवारपासून कापूस खरेदी सुरु होईल, असे सुरवसे यांनी सांगितले. पणन महासंघाची कापूस खरेदी सोमवारपासून सुरु होईल, असे विभागीय व्यवस्थापक ए. डी. रेनके यांनी सांगितले.