नागपूर : कोरोनाचा प्रभाव सर्वच क्षेत्रावर दिसू लागला असतानाच शासकीय कापूस खरेदीदेखील यामुळे प्रभावित होण्याची भीती वर्तविली जात आहे. कोरोनामुळे अनेक जिल्ह्यात जमावंबदी कलम १४४ लागू करण्यात आले आहे. त्याची दखल घेत महाराष्ट्र राज्य सहकारी कापूसउत्पादक पणन महासंघ खरेदी बंद ठेवण्याचा निर्णय घेऊ शकते, अशी माहिती पणनच्या विश्‍वसनीय सूत्रांनी दिली.  अवकाळी पाऊस, गारपीट तसेच वातावरणातील बदलाच्या परिणामी या वर्षी कापसाची प्रत खालावली. परिणामी कापसाला बाजारात ५५५० रुपये हमीभावाइतकाही दर मिळाला नाही. त्यामुळे शेतकऱ्यांनी सीसीआय तसेच पणन महासंघाला कापूस देण्यासाठी केंद्रावर एकच गर्दी केली. मराठवाड्यातील परळी झोनमध्ये यावर्षीच्या हंगामात सर्वाधिक कापसाची खरेदी झाली. विदर्भात मात्र दरातील तेजीच्या शक्‍यतेने कापसाची साठवणूक शेतकऱ्यांकडून करण्यात आली आहे.  सीसीआयकडून सप्टेंबर महिन्यापर्यंत खरेदी सुरू राहणार असल्याचे जाहीर करण्यात आले. कापसाची प्रत नसल्याने पणन महासंघाला मात्र यापुढील काळात खरेदी सुरु ठेवणे अडचणीचे ठरत आहे. त्यातूनच अवकाळी पाऊसही अधूनमधून पडत असल्याने प्रत आणखीच खालावत आहे. त्यामुळे होळीच्या आठ दिवसात खरेदी बंद ठेवण्यात आली. सोमवार (ता. १६) पासून खरेदी सुरू करण्याचे प्रस्तावीत होते. मात्र कोरोनाचा प्रादुर्भाव रोखण्यासाठी अनेक जिल्हयात जमावबंदी कलम १४४ लागू करण्यात आले आहे. त्याची दखल घेत खरेदी सुरु ठेवावी की बंद याबाबतचा निर्णय पणन महासंघाकडून आढाव्याअंती घेतला जाणार आहे. राज्यात ५२ लाख क्‍विंटल खरेदी राज्यात या वर्षी विक्रमी ५२ लाख क्‍विंटल कापसाची खरेदी झाली आहे. खरेदी केलेल्या या कापसाची किंमत २८०० कोटी रुपये इतकी असून, त्यातील २३०० कोटी रुपयांचे चुकारे करण्यात आले आहेत. सद्यःस्थितीत अमरावती जिल्ह्यात ४ केंद्रांवर खरेदी सुरू आहे.