सोलापूर :‘‘शहरात कोरोनाच्या रुग्णसंख्येत सातत्याने वाढ होत आहे. परिस्थिती गंभीर असली, तरी नियंत्रणात आहे आणि पुढील पंधरा दिवसांत ही परिस्थिती आणखी नियंत्रणात असेल. त्यावेळी चित्र काहीसे वेगळे दिसेल, काळजी करु नका’’, असे आवाहन राज्याचे जलसंपदा मंत्री जयंत पाटील यांनी पत्रकार परिषदेद्वारे केले.  

मंत्री पाटील हे रविवारी (ता.३) जिल्ह्याच्या दौऱ्यावर आले होते. राष्ट्रवादी काँग्रेसचे अध्यक्ष शरद पवार, उपमुख्यमंत्री अजित पवार यांच्या सूचनेनुसार आपण सोलापुरात कोरोनाच्या आढाव्यासाठी आलो असल्याचे त्यांनी सांगितले. यावेळी पालकमंत्री दत्ता भरणे उपस्थित होते. दुपारी जिल्हाधिकारी मिलिंद शंभरकर यांच्यासह सर्व वरिष्ठांची बैठक घेऊन कोरोनाची माहिती पाटील यांनी घेतली. तसेच काही सूचना केल्या. त्यानंतर पत्रकारांशी ते बोलले. 

पाटील म्हणाले, ‘‘सध्याचे जिल्ह्यातील सर्व अधिकारी चांगले काम करत आहेत. आरोग्य, महसूल वा पोलिस सर्वच यंत्रणा आपापल्या पद्धतीने जबाबदारीने काम करत आहेत. सोलापुरात रुग्ण वाढू नयेत, कोरोना चाचणीसाठी घेतल्या जाणाऱ्या स्वॅबपूर्वी काही उपाययोजना करता येतील का, ज्या ठिकाणी कोरानाबाधित रुग्ण आढळत आहेत. त्याठिकाणी प्रतिबंधित क्षेत्र तयार करुन आणखी कठोर उपाययोजना केल्या जातील का, हे तपासून निर्णय घ्या, तशा अधिकाऱ्यांना सूचना दिल्या आहेत, असे त्यांनी सांगितले. 

सोलापुरात वरिष्ठ अधिकारी नियुक्त करण्याचा निर्णय अद्याप झालेला नाही. नेमले तरी सध्याच्या अधिकाऱ्यांचेही काम चांगले आहे. पण, वरचे आणि खालचे अधिकारी असा विनाकारण वाद निर्माण करु नका, असेही पाटील यांनी स्पष्ट केले.