बुलडाणा ः ‘सकाळ रिलीफ फंडा’तून खामगाव तालुक्‍यातील शहापूर व लोणी कदमापूर शिवारात सिमेंट काँक्रिट बंधारा व नाला खोलीकरण करण्यात आला आहे. या कामांमधून परिसरातील शेतकऱ्यांसाठी सिंचनाची सोय उपलब्ध होणार आहे. या कामांचे नुकतेच मान्यवरांच्या उपस्थितीत लोकार्पण करण्यात आले.

पावसाचा पडणारा प्रत्येक थेंब जमिनीत मुरविणे, जलस्रोत बळकट करणे, भूजलपातळी वाढविण्यासाठी उपाययोजना करणे गरजेचे झालेले आहे. याच उद्देशाने हा बंधारा बांधण्यात आला. शिवाय नाल्याचे खोलीकरण करण्यात आले. ही कामे पूर्ण झाली असून श्रीमती रुख्मिणीबाई दादाराव तिडके यांच्‍याहस्‍ते बंधारास्‍थळी फीत कापून लोकार्पण करण्यात आले. 

कार्यक्रमाला करुणा तिडके, गजानन महाराज शिक्षण संस्‍थेचे विश्वस्‍त राजेंद्र शेगोकार, ‘सकाळ’च्या विदर्भ आवृत्तीचे कार्यकारी संपादक संदीप भारंबे, खामगाव येथील नायब तहसीलदार सुरेखा जगताप, तालुका कृषी अधिकारी गणेश गिरी, ‘सकाळ’चे वरिष्ठ वितरण व्‍यवस्‍थापक विजय वरफडे, लोणी गुरवचे सरपंच जानराव इंगळे, माजी सरपंच देवानंद इंगळे, शहापूरच्‍या सरपंच सविता प्रमोद कर्डेल आदी उपस्‍थित होते. रुख्मिणीबाई तिडके यांनी ‘सकाळ’ माध्यम समूहाच्‍या माध्यमातून या भागात झालेल्‍या या बंधाऱ्याचा परिसरातील शेतकऱ्यांना निश्चितच फायदा होणार असल्याचे सांगितले.

प्रास्ताविकात कार्यकारी संपादक श्री. भारंबे म्हणाले, केवळ बातम्या छापणे एवढेच कार्य ‘सकाळ’ माध्यम समूह करीत नाही तर विविध समाजोपयोगी कार्यक्रमांमध्ये प्रत्‍यक्ष सहभाग घेते. अनेक लोकोपयोगी कामे ‘सकाळ’च्‍या माध्यमातून केली जातात. जलसंधारणाचे काम हा एक उपक्रम असून जलस्रोत बळकट करून भूजलपातळी वाढण्याचे काम सकाळ रिलीफ फंडामार्फत राज्यात केले जाते. यावेळी इतर मान्यवरांनीही मनोगत मांडले.