पुणे : बंगालच्या उपसागरात कमी दाबाचे क्षेत्र अधिक सक्रिय झाले आहे. यामुळे विदर्भातील काही भागांत पावसासाठी पोषक वातावणात तयार होत आहे. आज (शुक्रवारी) आणि उद्या (शनिवारी) विदर्भातील अनेक भागात पाऊस पडण्याची शक्यता आहे. रविवारी आणि सोमवारी कोकण व विदर्भात मुसळधार पाऊस पडल्याचा अंदाज हवामान विभागाच्या सूत्रांनी व्यक्त केला.

गेल्या काही दिवसांपासून पावसाने उघडीप दिली आहे. यामुळे उकाड्यात वाढ झाली असून अनेक ठिकाणी उन्हाचा कडाका वाढला आहे. मध्य महाराष्ट्र, मराठवाडा व विदर्भात उन्हाचा पारा चांगलाच वाढला आहे. राज्यातील पुणे, जळगाव, सोलापूर, मुंबई, अलिबाग, डहाणू, औरंगाबाद, परभणी, नांदेड, अकोला, ब्रह्मपुरी, चंद्रपूर, गोंदिया, नागपूर, वाशीम, वर्धा येथील कमाल तापमान ३० अंशाच्या वर गेले आहे. गुरुवारी सकाळी ८ वाजेपर्यतच्या चोवीस तासात परभणी येथे राज्यातील सर्वाधिक ३४ अंश सेल्सिअस एवढ्या कमाल तापमानाची नोंद झाली. कोकणात काही भागात अंशतहा हवामान ढगाळ आहे. त्यामुळे तुरळक ठिकाणी पाऊस पडत आहे. कोकणातील म्हापसा, पेडणे, सावंतवाडी, वैभववाडी, काणकोन, चिपळून, कणकवली, मालवण, वेंगुर्ला येथे पावसाच्या हलक्या सरी कोसळल्या. घाटमाथ्यावरील अंबोणे, शिरगाव, ताम्हिणी, कोयना (पोफळी) येथे अधूनमधून पाऊस पडत होता. मध्य महाराष्ट्रातील गगनबावडा, पारोळा, चांदगड, जावळीमेधा, राधानगरी, सिंदखेडा, मराठवाड्यातील माजलगाव, विदर्भातील देऊळगाव राजा येथेही पावसाच्या हलक्या सरी पडल्या.

गुरूवारी (ता.२९) सकाळी आठ वाजेपर्यत पडलेला पाऊस, मिलिमीटरमध्ये (स्त्रोत हवामान विभाग)