सोलापूर : सोलापूर बाजार समितीच्या सार्वत्रिक निवडणुकीची तयारी पूर्ण झाली असून, येत्या रविवारी (ता. १) मतदान होणार आहे.

या निवडणुकीसाठी २२५ मतदान केंद्रे निश्‍चित केली असून, त्यापैकी ५४ मतदान केंद्रे संवेदनशील असल्याचा अहवाल पोलिस अधीक्षक कार्यालयाच्या वतीने निवडणूक निर्णय अधिकाऱ्यांना देण्यात आला आहे. त्यामुळे या केंद्रांवर व्हिडिओ शूटिंग करण्यात येणार आहे. संवेदनशील मतदान केंद्रांची संख्या आणखी वाढण्याची शक्‍यता आहे.

या निवडणुकीसाठी एकूण २२५ मतदान केंद्रे असली, तरी त्यापैकी २५ मतदान केंद्रे राखीव ठेवण्यात आली आहेत. मतदान साहित्याचे वाटप व मतदान साहित्य जमा करणे, मतमोजणी, मतपेट्या सुरक्षित ठेवणे ही सगळी प्रक्रिया सोरेगाव येथील एसआरपीएफ कॅम्पमध्ये होणार आहे. त्या ठिकाणी सीसीटीव्ही कॅमेरे लावण्यात येणार आहेत. १ जुलैला सकाळी आठ ते पाच या वेळेत मतदान आणि ३ जुलैला सकाळी मतमोजणीस सुरवात होणार आहे.

निकाल हाती येण्यास रात्रीचे आठ वाजण्याची शक्‍यता आहे. शेतकरी मतदारसंघातील १५ गणांची एकावेळी मतमोजणी केली जाणार आहे. एका गणासाठी दोन टेबल लावण्यात येणार आहेत.