गोंदिया ः कोरोना लॉकडाऊनमुळे शेतकऱ्यांना निविष्ठा खरेदीची अडचण भासू नये याकरिता थेट बांधावर निविष्ठा पुरवठ्याचे नियोजन कृषी विभागाकडून करण्यात आले आहे. सडक अर्जुनी तालुक्‍यातील सौंदड येथे आमदार मनोहर चंद्रिकापूरे यांच्या हस्ते निविष्ठा घेऊन जाणाऱ्या वाहनास हिरवी झेंडी दाखवीत या उपक्रमाची सुरुवात करण्यात आली.

कोरोना विषाणूचा संसर्ग रोखण्यासाठी देशभरात लॉकडाऊन जाहीर करण्यात आले आहे. याच काळात खरीप हंगाम तोंडावर असल्याने शेतकऱ्यांची निविष्ठा खरेदीची लगबग वाढली आहे. कोरोनाचा प्रादुर्भाव टाळण्यासाठी शिफारशीत उपाययोजनांचे पालन यामुळे होण्याची शक्‍यता नसल्याचे गृहीत धरून कृषी विभागाने थेट बांधावरच निविष्ठा पोचविण्यास सुरुवात केली आहे. सौंदड येथे आमदार मनोहर चंद्रिकापूर यांनी निविष्ठा घेऊन जाणाऱ्या या वाहनांना हिरवी झेंडी दाखविली.

शिवाजी महारात शेतकरी गट तसेच कन्हय्या कृषी बचतगट या दोन्ही गट मिळून १४.४३ क्‍विंटल धान बियाणे, १६.६६ टन रासायनिक खतांचा पुरवठा करण्यात येणार आहे. या दोन्ही गटांनी एकत्रित बियाणे व खत खरेदी केल्याने कमी दरात ते उपलब्ध झाले आणि वाहतुकीच्या खर्चातही बचत होण्यास मदत झाली आहे. यावेळी सडकअर्जुनी तालुका कृषी अधिकारी किशोर पात्रीकर, मंडळ कृषी अधिकारी प्रतीक्षा मेंढे, तालुका तंत्रज्ञान व्यवस्थापक राखी कहालकर, कृषी पर्यवेक्षक मनोज भालाधरे, कृषी सहायक वीरेंद्र बिसेन यांच्यासह बचतगटाचे पदाधिकारी उपस्थित होते.