नांदेड : जिल्ह्यात खरीप हंगाम २०२१ साठी एक हजार ११८ कोटी रुपयांचे पीक कर्जवाटपाचे उद्दिष्ट प्रशासनाने बँकांना दिले आहे. या बॅंकांनी शेतकऱ्यांना एक एप्रिलपासून कर्ज वाटपाला सुरवात केली. २.२१ टक्यानुसार आजपर्यंत दोन हजार ८०६ शेतकऱ्यांना २५ कोटी ७७ लाख रुपयांचे पीक कर्जवाटप केले आहे. यात राष्ट्रीयीकृत बँकांनी आजपर्यंत दोन टक्के पीक कर्जवाटप केल्याची माहिती जिल्हा उपनिबंधक (सहकारी संस्था) कार्यालयाकडून मिळाली.

जिल्हास्तरीय बँकर्स कमिटीच्या बैठकीत जिल्हाधिकारी डॉ. विपिन यांनी आगामी खरीप हंगामात जिल्ह्यासाठी एक हजार १६८ कोटी, तर रब्बीसाठी २९२ कोटी असे एकूण एक हजार ४६० कोटींचे पीक कर्जवाटपाचे उद्दिष्ट २८ बँकांच्या वेगवेगळ्या शाखांना दिले. यात जिल्हा बॅंकेला २०४ कोटी ३२ लाख, राष्ट्रीयीकृत बॅंका ७३८ कोटी ८७ लाख, तर महाराष्ट्र ग्रामीण बॅंक २२४ कोटी ८० लाखांचा समावेश आहे. 

  त्वरित पीक कर्जवाटप करा

कोरोनाच्या प्रादुर्भावामुळे ग्रामीण भागातील शेतकरी आर्थिक अडचणीत आले आहेत. यामुळे पेरणीपूर्वी खते, बियाणे घेण्यासाठी बॅंकांनी वेळेवर कर्ज पुरवठा केला, तर शेतकऱ्यांना खासगी व्यापाऱ्यांकडे जावे लागणार नाही, यासाठी त्वरित पीक कर्जवाटप करावे, अशी मागणी शेतकऱ्यांकडून होत आहे.