हिमायतनगर, जि. नांदेड ः हिमायतनगर तालुक्यातील अतिदुग॔म परिसरातील दरेसरसम तलावाचे काम अंतिम ठप्प्यामध्ये असताना एकरी ९ लाख रुपये जमिनीचा मावेजा द्यावा, या मागणीसाठी प्रकल्पग्रस्त शेतकऱ्यांनी बुधवारी (ता. २) तलावाच्या कामाच्या ठिकाणी सहकुटुंब ठिय्या आंदोलन सुरू केले. 

हिमायतनगर तालुक्यातील दरेसरसम, पवना आदेगाव, टेबी या ठिकणच्या शेती सिंचनासाठी लघु पाटबंधारे विभागातर्फे २००७ मध्ये दरेसरसम तलावाचे काम सुरू करण्यात आले. काम हे अंतिम टप्प्यामध्ये असताना गेल्या आठ वर्षापासून बंद होते. 

या तलावासाठी अनेक शेतकऱ्यांची ३०० हून अधिक एकर जमिन संपादित करण्यात आली. परंतु संपादित जमिनीचा मावेजा देताना २५ शेतकऱ्यांना एकरी ९ लाख रुपये याप्रमाणे देण्यात आला. तर ९५ शेतकऱ्यांना एकरी १ लाख ३० हजार रुपये प्रमाणे मावेजा देण्यात आला. 

त्यामुळे एकसमान म्हणजेच एकरी ९ लाख रुपयाप्रमाणे जमिनीचा मावेजा देण्यात यावा, या मागणीसाठी ९५ शेतकऱ्यांनी कुटुंबासह तलावाच्या भिंती जवळ ठिय्या आंदोलन करत तलावाचे काम रोकले. प्रशासनाने प्रकल्पग्रस्त शेतकरी कुटुंबातील एका सदस्याला शासकीय नोकरीत घेण्याचे आश्वासन दिले होते, तेही पूर्ण केले नाही.