नाशिक : ‘‘मालेगाव तालुक्यातील चंदनपुरी येथील श्री क्षेत्र खंडेराव महाराज यात्रोत्सव दरवर्षी पौष पौर्णिमेला जानेवारी महिन्यात होत असतो. हा यात्रोत्सव १५ ते २० दिवस चालत आहे. या ठिकाणी जवळपास दीड ते दोन लाख भाविक दर्शनासाठी येत असतात. जिल्ह्यासह संपूर्ण राज्यात कोरोनाच्या नवीन स्ट्रेनच्या विषाणूचे संकट उभे ठाकले. त्यामुळे याचा प्रादुर्भाव रोखण्यासाठी यावर्षी चंदनपुरी यात्रोत्सवास परवानगी नाकारली’’, अशी माहिती उपविभागीय दंडाधिकारी विजयानंद शर्मा यांनी दिली. 

श्रीक्षेत्र खंडेराव महाराज यात्रा यावर्षी २८ जानेवारीपासून सुरु होणार होती. परंतु संपूर्ण राज्यात कोरोना विषाणूचा प्रादुर्भाव नव्या रूपाने वेगात पसरत आहे. राज्यात शासनाने लॉकडाऊनचा कालावधी हा ३१ जानेवारीपर्यंत वाढविला आहे. अशा संकटाच्या काळात यात्रा, उरुस व इतर धार्मिक उत्सवांमध्ये ज्या ठिकाणी मोठ्या प्रमाणावर जमाव एकत्र होऊ शकतो. अशा कार्यक्रमांना शासनाने परवानगी दिलेली नाही. त्याच अनुषंगाने चंदनपुरी येथील श्री क्षेत्र खंडेराव महाराज यात्रेस परवानगी नाकारण्यात आल्याचे शर्मा यांनी कळविले.

कोरोनाचा प्रादुर्भाव वाढण्याची शक्यता लक्षात घेऊन यात्रोत्सवाची परवानगी नाकारण्यात आली. तसे चंदनपुरी ग्रामपालिकेच्या प्रशासकांना लिखित स्वरूपात कळविण्यात आले आहे. या यात्रोत्सवाची परवानगी नाकारण्यात आल्याची माहिती स्थानिक पोलिस प्रशासनास कळविण्यात आली आहे. तरी या यात्रोत्सवात सहभागी होणाऱ्या सर्व भाविकांनी याची नोंद घ्यावी, असे आवाहनही करण्यात आले.