पुणे : राज्याच्या किमान तापमानात घट होत असतानाच, कोकण, मध्य महाराष्ट्राच्या दक्षिण भागात ढगाळ हवामान होत आहे. आज (ता. ९) कोकण, मध्य महाराष्ट्रात तुरळक ठिकाणी हलक्या पावसाची शक्यता आहे. उर्वरित राज्यात हवामान मुख्यत: कोरडे राहण्याचा अंदाज हवामान विभागाने वर्तविला आहे. 

‘जवाद’ चक्रीवादळ निवळल्यानंतर पश्‍चिम बंगाल आणि बांगलादेशाच्या किनारपट्टीजवळ वाहणारे चक्राकार वारे, महाराष्ट्र लगतच्या अरबी समुद्रात असलेली चक्राकार वाऱ्यांची स्थिती निवळली आहे. तर वायव्य भारतात थंडी वाढू लागली असून, राजस्थानात थंडीच्या लाटेचा इशारा देण्यात आला आहे. बुधवारी (ता. ८) चुरू येथे देशाच्या सपाट भूभागावरील सर्वांत नीचांकी ४.५ अंश सेल्सिअस तापमानाची नोंद झाली. 

राज्यात उन्हाचा चटका वाढला असतानाच, अनेक भागांत अंशतः ढगाळ हवामान होत आहे. त्यामुळे कमाल आणि किमान तापमानात चढ-उतार होत आहेत. बुधवारी (ता. ८) पुणे येथे नीचांकी १४.३ अंश सेल्सिअस तापमान नोंदले गेले. तर सकाळपर्यंतच्या २४ तासांमध्ये सांताक्रूझ येथे उच्चांकी ३३.२ अंश सेल्सिअस तापमान नोंदले गेले.

बुधवारी (ता. ८) सकाळपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअसमध्ये) : पुणे २८.५ (१४.३), नगर २९.४ (-), जळगाव २९.३ (१८.५), कोल्हापूर २९.४ (१८.५), महाबळेश्‍वर २३.२(१४.४), मालेगाव २६.४ (-), नाशिक २७.४ (१५.८), निफाड २७.० (१५.८), सांगली ३०.४ (१७.२), सातारा २८.८(१५.५), सोलापूर ३२.४ (१७), सांताक्रूझ ३३.२(२३.४), अलिबाग ३२.४ (२१.०), डहाणू ३०.६ (२०.८), रत्नागिरी ३२.२ (२१.०), औरंगाबाद २९.० (१५.६), नांदेड २९.७ (१९.४), उस्मानाबाद - (१९.४), परभणी २९.८ (१९.३), अकोला ३०.४ (१९.९), अमरावती २८.८ (१७.२), ब्रह्मपुरी ३२.५ (१७.२), बुलडाणा २७.८ (१७.२), चंद्रपूर ३०.० (१८.२), गडचिरोली ३१.०(१७.६), गोंदिया २९.६ (१४.४), नागपूर ३०.१ (१७), वर्धा ३० (१७.४), वाशीम २७.५ (१४), यवतमाळ ३० (१६.५).