परभणी ः महाराष्ट्र कॉटन जिनर्स असोशिएशनचा संप तसेच मकर संक्रांतीची सुट्टी असल्यामुळे राज्यातील भारतीय कापूस महामंडळाच्या (सीसीआय) मराठवाडा, खानदेश तसेच नगर जिल्ह्यातील ४८ केंद्रांवरील कापूस खरेदी सोमवार (ता. ११) ते गुरुवार (ता. १४) या कालावधीत बंद राहणार आहे. या बाबत केंद्र प्रमुखांनी संबंधित कृषी उत्पन्न बाजार समित्यांना सूचना द्याव्यात, असे आदेश ‘सीसीआय’च्या औरंगाबाद येथील उपमहाव्यवस्थाकांनी पत्राद्वारे दिले आहेत. 

‘सीसीआय’ तसेच पणन महासंघाकडून लॉकडाउनच्या काळात खरेदी केलेला कापूस, सरकी, गाठी यांच्या नुकसानीबद्दल भरपाईची मागणी करण्यात आली आहे. ही मागणी रद्द करण्यात यावी या मागणीसाठी महाराष्ट्र कॉटन जिनिर्स असोसिएशन तर्फे सोमवार (ता. ११) आणि मंगळवारी (ता. १२) जिनिंग कारखाने बंद ठेवण्यात आहेत. त्याबाबत असोसिएशनने ‘सीसीआय’ला कळविले आहे. बुधवारी (ता. १३) भोगी आणि गुरुवारी (ता. १४) मकर संक्रांत असल्यामुळे कापूस खरेदी बंद राहणार आहे. त्यामुळे गैरसोय टाळण्यासाठी या कालावधीत शेतकऱ्यांनी या केंद्रावर कापूस विक्रीसाठी आणू नये, असे आवाहन करण्यात यावे.  केंद्र प्रमुखांना आदेश  या कालावधीत केंद्र प्रमुखांनी परवानगीशिवाय केंद्र कार्यालय सोडू नये, असे आदेश भारतीय कापूस महामंडळाच्या बदनापूर, भोकरदन, बीड, भुसावळ, चाळीसगाव, बोदवड, जामनेर, दोंडाईचा, जिंतूर, जवळा बाजार, जालना, चोपडा, जळगाव, घनसावंगी, गेवराई, गंगापूर, एरंडोल, नंदुरबार, धर्माबाद, कुंटुर, नायगाव, किनवट, वसमतनगर, नांदेड, मानवत, मंठा, लासूर, पाचोड, वैजापूर, शिरपूर, शेवगाव, शहादा, सेलू, ताडकळस, पूर्णा, परतूर, शेंदूर्णी, पहूर, पाचोरा, शहागड, वडवणी, राजूर, शिंदखेडा, नवापूर, यावल, रावेर, बोरी, सोनपेठ येथील केंद्र प्रमुखांना दिले आहेत.