उत्तूर, जि. कोल्हापूर : आधी पुनर्वसन मग धरण हा कायदा असताना पोलिस बंदोबस्तात आंबेओहळची घळभरणी करणाऱ्या कृष्णा खोरे विकास महामंडळाच्या अधिकाऱ्यांवर गुन्हा दाखल करा, अशी मागणी आंबेओहळ धरणग्रस्तांनी केली. धरणग्रस्तांच्या मागणीकडे दुर्लक्ष करून पोलिस बंदोबस्तात घळभरणीचे काम सुरू केल्याच्या निषेधार्थ उत्तूर (ता. आजरा) येथील शिवाजी महाराज यांच्या पुतळ्याजवळ धरणग्रस्तांनी लाक्षणिक आंदोलन केले. छत्रपती शिवाजी महाराज यांच्या पुतळ्याला पुष्पहार अर्पण करून आंदोलनाला सुरवात झाली. शासनाच्या विरोधात घोषणा देण्यात आल्या. 

शिवाजी गुरव म्हणाले, ‘‘स्थानिक लोकप्रतिनिधी लाभधारक शेतकऱ्यांच्या मताचा गठ्ठा डोळ्यासमोर ठेवून काम करीत आहेत. अधिकाऱ्यांनी घळभरणीचे काम बंद ठेवून पुनर्वसनाच्या कामाला प्राधान्य दिले पाहिजे.’’ जनता दलाचे तालुका अध्यक्ष सदानंद व्हनबट्टे, नाना पुंडपळ, श्रीराम चौगुले, सदा शिवणे, दाजीबा पोटे, विशाल गुरव उपस्थित होते. 

दरम्यान, आंबेओहळ प्रकल्प विकास परिषदेने जिल्हाधिकाऱ्यांना निवेदन सादर केले. यामध्ये आंबेओहळ प्रकल्पस्थळावर ग्रामविकास मंत्री हसन मुश्रीफ यांच्या समवेत बैठक झाली. या वेळी ३१ जानेवारी पूर्वी पुनर्वसन पूर्ण होईल, असे आश्‍वासन दिले. प्रत्यक्षात पोलिस बंदोबस्तामध्ये काम सुरू ठेवले व पुनर्वसन मात्र रखडत ठेवले. जिल्हाधिकाऱ्यांनी घळभरणीला परवानगी दिली आहे का? नसेल तर अधिकाऱ्यांवर कारवाई करावी व दिली असेल तर धरणग्रस्थांना इच्छा मरणाची परवानगी द्यावी, म्हणजे धरणग्रस्त घळभरणीमध्ये उड्या मारून आत्महत्या करतील, असे निवेदनात नमूद केले आहे. निवेदनावर सचिन पावले, महादेव खाडे, राजू देशपांडे, सागर सरोळकर यांच्यासह धरणग्रस्थांच्या स्वाक्षऱ्या आहेत.