नवी दिल्ली : ब्राझीलमधील  साखर उत्पादन यंदा तब्बल ५२.३ टक्क्यांनी घटले आहे. आतापर्यंत येथे ३ लाख ४० हजार टन साखर उत्पादन झाले आहे. मागील वर्षी याच काळात ७ लाख १३ हजार टन उत्पादन झाले होते. यंदा येथील कारखान्यांनी इथेनॉलनिर्मितीवर भर दिला आहे, अशी माहिती येथील शुगरकेन इंडस्ट्रीज असोसिएशनने दिली.   ब्राझील हा साखर उत्पादक आणि निर्यातदार देश आहे. येथील साखर कारखान्यांनी १ ते १५ एप्रिलदरम्यान १३८.७ लाख टन उसाचे गाळप केले आहे. गेल्या वर्षीच्या तुलनेत ३८ टक्के गाळप घटले आहे. त्यामुळे ब्राझीलने यंदापासून इथेनॉलनिर्मितीवर अधिक लक्ष केंद्रित केल्याचे स्पष्ट होते. येथील गाळप हंगाम संपेपर्यंत अधिक प्रमाणात ऊस इथेनॉलनिर्मितीकडे वळण्याची शक्यता आहे. कच्च्या साखरेचे करार चढ्या दराने ब्राझील देशामध्ये कच्च्या साखरेचे उत्पादनही मोठ्या प्रमाणात होते. त्यामुळे बाजारात करार करण्यासाठी ब्राझीलमधील निर्यातदारांना पसंती अधिक असते. गुरुवारी बाजारात जुलैसाठीचे कच्च्या साखरेचे करार पौंडसाठी १२.६९ सेंटवर झाले. परंतु, इथेनॉलकडे अधिक ऊस जात असल्याचे चित्र असल्याने येथील कच्च्या साखरेचा बाजार लगेच वधारला. सोमवारी कच्च्या साखरेचे दर गेल्या दोन महिन्यांतील उच्चांकी प्रतिपौंड १३.०५ सेंटवर पोचले. इथेनॉलसाठी अधिक ऊस ब्राझीलमध्ये पहिल्या पंधरा दिवसांत गाळप केलेल्या एकूण उसापैकी केवळ २३.५५ टक्के ऊस साखरनिर्मितीसाठी वापरण्यात आला आहे, तर तब्बल ७६.४५ टक्के ऊस इथेनॉलनिर्मितीसाठी वापरण्यात आला आहे. गेल्या वर्षी याच काळात ३२ टक्के ऊस साखरनिर्मितीसाठी वापरण्यात आला होता. तसेच, इथेनॉलनिर्मिती ७३७ लाख लिटर झाली होती.