नाशिक : बागलाण तालुक्यातील शेरमाळ डोंगरावरील गुजरात राज्याकडे वाहून जाणारे पाणी बागलाण तालुक्यात वळविण्यासाठी वाघंबा वळण बंधारा ही नियोजित योजना तयार करण्यात आली. त्याचा प्रारंभ आमदार दीपिका चव्हाण यांच्या हस्ते हा करण्यात आला. हरणबारी धरणामध्ये येणाऱ्या पाण्याचा मोसमसह काटवन परिसराला आधार होणार आहे. 

चव्हाण यांच्या हस्ते या वाघंबा वळण बंधारा कामाचा लोकार्पण झाले. अध्यक्षस्थानी माजी पंचायत समिती सभापती विमलबाई महाले होत्या. माजी आमदार संजय चव्हाण, शैलेश सूर्यवंशी, शहराध्यक्ष राजेंद्र सोनवणे, नगरसेवक काकाजी सोनवणे, अशोक सावंत, काशिनाथ महाले, सोमनाथ चौधरी, गिरिदास महाले, जाकीर शेख, संगीता साबळे, वैशाली सूर्यवंशी, शमा दंडगव्हाळ, भाईदास महाले आदी उपस्थित होते.

चव्हाण म्हणाल्या, ‘‘बागलाण गुजरात राज्याला लागून आहे. येथील डोंगर रांगावरील पावसाचे पाणी गुजरात राज्यात वाहून जाते. यामुळे तेथून पश्‍चिम वाहिनीद्वारे अरबी समुद्रात वाहून जाणारे पाणी अडवून ते तापी या तुटीच्या खोऱ्यातील हरणबारी मध्यम प्रकल्पात वळविण्यासाठी तत्कालीन खासदार प्रताप सोनवणे यांनी शासनस्तरावर पाठपुरावा केला. नियोजित वळण योजना वाघंबा शेरमाळ डोंगराचे पाणलोट क्षेत्र ०.५२ चौ. कि.मी आहे. जलनिष्पत्ती १६.७८ द.ल.घ.फु. आहे. पूर्ववाहिनी तापी खोऱ्यात हे पाणी वळविणे प्रस्तावित आहे.’’

‘‘या योजनेद्वारे हरणबारी धरणातील जलसाठ्यात वाढ होऊन बागलाण तालुक्यातील मोसमसह काटवन परिसरातील शेतीसिंचनाचा प्रश्‍न मार्गी लागणार आहे. आगामी काळात ही योजना कार्यान्वित करून पुढील पावसाळ्यात त्याचा फायदा होईल. बागलाणमधील शेती ''सुजलाम सुफलाम'' होण्यास मदत होईल, अशी ग्वाही चव्हाण यांनी दिली.