नाशिक : कृषी निविष्ठा विक्री केंद्रांवरील कारवाईचा बडगा उगारण्यात येत असल्याच्या निषेधार्थ महाराष्ट्र फर्टिलायझर्स, पेस्टिसाईड्स, सीड्स, डीलर्स असोसिएशनने १० ते १२ जुलै दरम्यान तीन दिवस कृषी निविष्ठा विक्री केंद्रे बंद ठेवण्याचे जाहीर केले. त्यास नाशिक ऍग्रो डिलर्स असोसिएशनचा पाठिंबा मिळाला. त्यामुळे शुक्रवारी (ता.१०) नाशिक शहरासह १४ जिल्ह्यात बंद पाळण्यात आला. 

कृषी निविष्ठा विक्रेते हे शासनाने मान्यता दिलेल्या कंपन्यांकडून बियाणे खरेदी करून पिशवीबंद माल शेतकऱ्यांना विकतो. कंपनी व शेतकरी यांचा दुवा या प्रमाणे विक्री होते. मग विक्रेत्यांवर कारवाई का, असा सवाल उपस्थित करण्यात आला. यात विक्रेत्यांचा थेट संबंध नसल्याने त्यांना कारवाईच्या कक्षेत आणू नये, अशी मागणी करण्यात आली. पहिल्या दिवशी कडकडीत बंदला पाळण्यात आला. पुढील दोन दिवस तो बंद कायम राहील, असे विक्रेत्यांनी सांगितले. 

जिल्ह्यातील १४ तालुक्यांमध्ये बंद पाळण्यात आला. मात्र, मालेगाव तालुक्यात हा बंद पाळण्यात आला नाही. कृषिमंत्री दादा भुसे यांचा अप्रत्यक्ष दबाव असल्याची चर्चा आहे. तर, कृषी निविष्ठा विक्रेत्यांना संपर्क साधला असता, मालेगाव तालुक्यात सोयाबीन क्षेत्र कमी असल्याने सहभागी झालो नसल्याचे सांगण्यात आले.