नाशिक : मालेगाव शहरातील वाढती कोरोनाबाधितांची संख्या नियंत्रणात आणण्यासाठी शासकीय पातळीवरून अनेक उपाययोजना केल्या जात आहेत. प्रशासकीय पातळीवरून काही बदल केले जात असताना नाशिक लाचलुचपत प्रतिबंधक विभागातील पोलिस अधीक्षक सुनील कडासने यांची कोरोनाच्या पार्श्वभूमीवर मालेगावी कायदा व सुव्यवस्था बंदोबस्त कामी तात्पुरती नियुक्ती करण्यात आली आहे. 

सुनील कडासने यांनी यापूर्वी मालेगाव शहरात सेवा बजावली आहे. त्यांच्या कार्यकाळात शहरातील मुस्लीम समुदायात त्यांनी चांगली प्रतिमा निर्माण केली होती. उर्दू भाषेवर प्रभुत्व असल्याने शहरातील सलोखा राखण्यात त्यांना यश आले होते. सध्या याठिकाणी कोरोनाच्या पार्श्वभूमीवर मोठी पोलिस यंत्रणा सध्या तैनात आहे. यंत्रणा व स्थानिक नागरिकांचा समन्वय साधण्यासाठी त्यांची भूमिका महत्त्वाची ठरणार आहे.