पुणे ः पशुधनाला तातडीने आणि दर्जेदार पशुवैद्यकीय सेवा आता ॲपद्वारे मिळणार असून, पशुवैद्यकीय दवाखान्यांमधील पारंपरिक पद्धतीने ठेवण्यात येणारी पशुवैद्यकीय सेवांच्या नोंदीची विविध १८ रजिस्टरदेखील आता बंद करण्यात येणार आहे, अशी माहिती पशुसंवर्धन आयुक्त लक्ष्मीनारायण मिश्रा यांनी दिली.  पारंपरिक पशुवैद्यकीय सेवा आता ऑनलाइन आणि अत्याधुनिक करण्यासाठी विशेष ॲप विकसित करण्यात येत आहे. या ॲपद्वारे पशुपालक आणि शेतकऱ्यांनी आपल्याकडील विविध पशुधनाची नोंद करणे बंधनकारक करण्यात येणार आहे. या ॲपवर संबंधित पशुवैद्यकीय दवाखाना, आणि अधिकाऱ्यांची देखील नोंद असणार आहे. पशुधनाला झालेल्या आजाराची नोंद शेतकऱ्यांनी ॲपवर करावयची आहे. यानंतर संबंधित पशुवैद्यकीय अधिकारी पशुधनावर उपचार करणार असून, केलेल्या उपचाराची नोंद या ॲपवर करणार आहे. यामुळे संबंधित पशुधनाच्या आजार केलेला औषधोपचार यांचा इतिहास तयार होणार आहे. यामुळे भविष्यात उपचार करताना, संबंधित पशुवैद्यकीय अधिकाऱ्याला आजाराची माहिती मिळणार आहे. तसेच, पशुधनाला अधिकच्या उपचारासाठी दवाखान्यात आणल्यानंतर व्यक्तींप्रमाणे त्यांची संगणकीय नोंद होणार असून, त्याला एक विशिष्ट कोड क्रमांक देण्यात येणार आहे. हा कोड त्या पशुधनाची ओळख असणार असून, भविष्यात कायमस्वरूपी सेव्ह असणार आहे, असेही आयुक्त मिश्रा यांनी सागितले. 

८० तालुक्यांसाठी मोबाईल हॉस्पिटल लवकरच  महाराष्ट्रातील दुर्गम भागात पशुवैद्यकीय सेवा तातडीने मिळण्यासाठी ८० तालुक्यांसाठी मोबाईल हॉस्पिटल सुरू करण्यात येणार आहे. यासाठी १२ कोटींचा निधी मंजूर असून, पीपीपी तत्त्वावर ही हॉस्पिटल सुरू करण्यात येणार आहे. यासाठी वाहनांची निवड प्रक्रिया सुरु असून, या वाहनांमध्ये अत्याधुनिक आरोग्य सुविधा यंत्रणा उपलब्ध करून देण्यात येणार आहे, असेही आयुक्त मिश्रा यांनी सांगितले.