अकोला : जिल्ह्यातील केळी निर्यात होऊ लागल्याने एकीकडे केळी उत्पादनाकडे शेतकरी वळत असतानाच वातावरणातील बदलाचा फटका सहन करावा लागत अाहे. जिल्ह्यात अकोट तालुक्यात केळीवर करप्याचे प्रमाण सध्याच्या वातावरणामुळे वाढत असल्याचे शेतकऱ्यांचे म्हणणे अाहे.   

अकोट, तेल्हारा तालुक्यात केळीचे क्षेत्र दिवसेंदिवस वाढत चालले अाहे. थंडीचा वाढलेला जोर, पानांवर साचणाऱ्या दवबिंदूमुळे करप्याचे प्रमाण वाढले अाहे. अकोट तालुक्यातील बहुतांश भागात सिंचनाची व्यवस्था असल्याने नगदी पैसे देणारे पीक म्हणून शेतकरी केळी पिकाकडे वळत आहेत. गेल्या काही दिवसांपासून बदलत्या वातावरणाचा परिणाम या पिकाला सहन करावा लागत आहे. जास्त प्रमाणात थंडी आणि रात्री पडणारा दव यामुळे येथील केळीबागा करपा बाधित झाल्याने केळी उत्पादकांना पुन्हा एकदा अस्मानी संकटाला सामोरे जावे लागण्याची शक्यता आहे.

करप्यामुळे केळीची पाने पिवळी पडून नंतर वाळत अाहेत. याचा परिणाम केळीचे घड निसवण्यावर होतो. घड लहान पडणे, फणीमध्ये केळांची संख्या कमी राहणे असे परिणाम होत असल्याने शेतकऱ्यांची चिंता वाढली अाहे.