कोल्हापूर : उसाचे फायदेशीर पीक घेणारे शेतकरीही यंदा हुमणीच्या तडाख्याने त्रस्त झाले आहेत. जिल्ह्यातील हुमणीने खराब होणारा ऊस चाऱ्यासाठी मोफत दिल्याशिवाय पर्याय उरला नाही. मोफत न्या, चाऱ्यासाठी न्या; पण ऊस न्या असे म्हणण्याची वेळ हुमणीचा प्रादुर्भाव झालेल्या ऊस उत्पादकांवर आली आहे.

कारखान्यांनी हुमणी नियंत्रणासाठी एक अभियान म्हणून पुढाकार घेऊन शेतकऱ्यांना तांत्रिक मदत करावी अशी मागणी शेतकऱ्यांतून होत आहे. विशेष जो ऊस वाढीच्या अवस्थेत आहे त्या उसालाही याचा फटका बसत आहे.

यंदाचा ऊस हंगामात गेल्या वर्षीच्या दरापेक्षा जादा दर मिळूनही उत्पन्नात घट होणार असल्याने यंदाही ऊस उत्पादक नफ्यात येण्याची शक्‍यता कमी असल्याचे ऊस उत्पादकांचे म्हणणे आहे.

केवळ उपलब्ध पाण्याच्या साठ्यावर उसाची अपेक्षित वाढ होत नाही. पाऊस व पावसाळी वातावरणातून मिळणारे घटकही उसाच्या वाढीला महत्त्वाचे ठरत असतात. जिल्ह्याच्या पश्‍चिम भागात प्रत्येक वर्षी एक ते दोन महिने पावसाची संततधार असते. तर पूर्व भागात पावसाळी ढगाळ हवामान असल्याने उसाची वाढ चांगली होते.

यंदा मात्र आठ ते दहा दिवसांचा पावसाचा कालावधी सोडल्यास संपूर्ण पावसाचे प्राबल्य असणाऱ्या जुलै व ऑगस्ट महिन्यात पूर्णपणे उन्हाळासदृश परिस्थिती राहिली. यामुळे जमिनीचा वाफसा कमी झाला. अनेक ठिकाणी पाणी देऊनही जमिनीची तहान भागली नाही. परिणामी जमिनीत हुमणी किडीची मोठी वाढ झाली.

हुमणीने खरीप पिकांच्या मुळावर तर हल्ला केलाच; परंतु उसाची मुळेही खाल्ल्याने त्याचा विपरीत परिणाम उसाच्या वाढीवर झाला. उसाची वाढ खुरटल्याने ऊस आहे त्या अवस्थेतच पिवळा होऊन खराब होऊ लागला आहे.