सिंधुदुर्ग : गेल्या आठवड्यात सलग चार दिवस झालेल्या ढगाळ हवामानाचा मोठा फटका कोकणातील काजूला बसण्याची शक्‍यता निर्माण झाली आहे. अगोदरच उशिरा मोहोर आलेला काजू, वाढीच्या अवस्थेत असताना ढगाळ हवामान निर्माण झाल्याने त्याचा मोठा फटका वाढीच्या अवस्थेतील काजूला बसत आहे. या हवामानामुळे ढेकण्याचा (की मॉस्कीटो), तसेच फुलकिडीचा उपद्रव वाढत आहे. कीडरोग वेळीच आटोक्‍यात न आल्यास काजू खराब होण्याची शक्‍यता असल्याचे तज्ज्ञांचे मत होते.

यंदा कोकणातील काजूची वाटचाल फारशी सुखावह राहिली नाही. माहोर सुटण्याच्या वेळेसच पाऊस, धुक्‍याचे संमिश्र हवामान राहिल्याने मोहोर उशिरा आला. त्यानंतर हवामान स्वच्छ राहिल्याने काजूची वाढ चांगली होत होती, परंतु काजू परिपक्व होत असतानाच कोकणात गेल्या आठवड्यात सातत्याने ढगाळ हवामान राहिले. क्वचित प्रसंगी सूर्यदर्शन झाले. यातच तापमानातही मोठी वाढ झाली. 

उष्ण व ढगाळ हवामानामुळे रोगकिडींचा प्रादुर्भाव होण्यास सुरवात झाली आहे. यामुळे काजू उत्पादकांत चिंतेचे वातावरण पसरले आहे. शेतकऱ्यांनी तातडीने काजूवर कीडनाशकांची फवारणी करून काजू बागा वाचवाव्यात, असे आवाहन कृषी विद्यापीठे व शास्त्रज्ञांनी केले आहे.

ढगाळ हवामानामुळे काजूच्या वाढीवर विपरीत परिणाम होऊन रोगकीड वाढत आहे. यामुळे उत्पादनात घट येण्याची शक्‍यता आहे. शेतकऱ्यांनी याकडे गांभीर्याने पाहून कीडनाशकांची फवारणी करून घ्यावी.  - डॉ. विलास सावंत, शास्त्रज्ञ,  कृषी विस्तार, कृषी विज्ञान केंद्र, सिंधुदुर्ग