अमरावती  ः येत्या खरीप हंगामात शेतकऱ्यांची बियाणे, खते व किडनाशक खरेदी करताना फसवणूक होऊ नये, याकरीता कृषी विभागाने दक्ष राहण्याच्या सूचना विभागीय आयुक्‍त पीयूष सिंह यांनी केल्या. दर्जेदार बियाणे व कृषी निविष्ठांची उपलब्धता व्हावी याकरीता विभागीय गुणवत्ता नियंत्रण कार्यशाळेचे आयोजन कृषी व्यवस्थापन प्रशिक्षण संस्था (रामेती) येथे करण्यात आले. यावेळी ते बोलत होते.

अमरावती विभागाअंतर्गंत असलेल्या अकोला, अमरावती, बुलडाणा, वाशीम, यवतमाळ या पाच जिल्ह्यातील सर्व कृषी अधिकारी या कार्यशाळेला उपस्थित होते. आयुक्त पीयूष सिंह म्हणाले, की खरीप हंगामात शेतकऱ्यांची बियाणे, खते व कीडनाशक खरेदी करताना फसवणूक होऊ नये याकरिता कृषी विभागाने दक्ष राहण्याची गरज आहे. कृषी निविष्ठा तपासणीवेळी जागरूकतेने काम करणे अपेक्षित आहे. कृषी निविष्ठा खरेदीच्या तयारीत असलेल्या शेतकऱ्यांशी सुसंवाद साधला जावा, त्यांच्या अपेक्षा या माध्यमातून जाणून घेतल्या पाहिजेत. 

या हंगामात सर्व प्रकारच्या निविष्ठा मुबलक प्रमाणात उपलब्ध असल्याने अनधिकृत निविष्ठांऐवजी अधिकृत व प्रमाणित निविष्ठांच्या वापराविषयी जागृती व्हावी. त्याच प्रयत्नाअंतर्गत आयोजित ही कार्यशाळा स्तुत्य असल्याचे पीयूष सिंह म्हणाले.

विभागीय कृषी सहसंचालक सुभाष नागरे यांनी अवैध निविष्ठांच्या नियंत्रणासाठी सर्वंच यंत्रणाचे सहकार्य उपलब्ध होते. त्याबाबत कोणीही शासंक राहू नये; अनधिकृत बियाणे व इतर निविष्ठांवरील कारवाईला वेग देणे गरजेचे आहे. शासनाने १४ एप्रिल ते ५ मे या कालावधीत ग्राम स्वराज अभियान राबविण्याचे निश्‍चित केले आहे.

त्याअंतर्गत १ मे रोजी महाराष्ट्रदिनी कृषी विभागाच्या सर्व योजनांची माहिती ग्रामपंचायत स्तरावर शेतकऱ्यांना देण्यात यावी. शेतकऱ्यांचे उत्पन्न दुप्पट करण्यासाठी किसान कल्याण कार्यशाळा आयोजित करण्यात यावी. कार्यशाळेला विभागीय अधिक्षक कृषी अधिकारी विजय चवाळे, रामेतीचे प्राचार्य उदयकुमार नलावडे, राजेश मेरगेवार, नितल पाटील यांची उपस्थिती होती.