नगर  ः ज्येष्ठ समाजसेवक अण्णा हजारे यांनी दिल्ली येथे आपल्या विविध मागण्यांसाठी सुरू केलेले उपोषण गुरुवारी (ता. २९) सातव्या दिवशी सुटल्याचे समजताच सात दिवसांपासून चिंतेत असलेल्या त्यांच्या राळेगणसिद्धी गावांतील गावकऱ्यांनी सायंकाळी जल्लोष केला. गुलाल उधळत साखर वाटून आनंद व्यक्त केला. 

ज्येष्ठ समाजसेवक अण्णा हजारे यांनी शेतकऱ्यांच्या मालाला उत्पादन खर्चाच्या दीडपट बाजारभाव मिळावा, वयोवृद्ध शेतकऱ्यांना पेन्शन मिळावी व लोकपाल लोकायुक्तांची नेमणूक करावी, तसेच निवडणूक कायद्यात सुधारणा कराव्यात या मागण्यांसाठी बेमुदत उपोषण सुरू केले होते. त्यांच्या अंदोलनाला पाठिंबा म्हणून राळेगणसिद्धी ग्रामस्थांसह पारनेर तालुक्‍यातील गावगावांतही आंदोलने केली जात होती. 

सात दिवस होऊनही उपोषण सुटत नसल्याने चिंता व्यक्त केली जात होती. त्यामुळे सरकारचा निषेध करत ग्रामस्थांनी आत्मदहनाची संपूर्ण तयारीदेखील केली होती. मात्र, गुरुवारी सकाळपासूनच उपोषण सुटण्याची शक्‍यता वाढली होती. त्यामुळे गावकऱ्यांचे लक्ष दिल्लीकडे लागले होते. दिवसभर महिलांसह मोठा जनसमुदाय यादवबाबा मंदिरासमोर बसून होता. 

उपोषण सुटल्याचे कळताच गुलाल उधळत, राष्ट्रीय गीतांच्या ठेक्‍यावर व वाद्यांच्या गजरात उपस्थितांनी आनंदोत्सव साजरा केला. महिलांनीही या आनंदात फुगडी खेळून, गाणे म्हणत उत्साहात भाग घेतला. 

या वेळी उपसरपंच लाभेश औटी, माजी सरपंच जयसिंग मापारी, नीलेश लंके, राहुल शिंदे, सबाजी गायकवाड, संजय वाघमारे, शंकर नगरे, संतोष खोडदे, रोहिदास पठारे, सुभाष पठारे, संजय पठाडे आदींसह मोठ्या संख्येने महिला व ग्रामस्थ उपस्थित होते. ‘‘अण्णांनी केलेल्या मागण्या सरकारने मान्य केल्या. मात्र, त्यासाठी सरकारने आमच्या दैवतास सात दिवस त्रास दिला. त्यामुळे मी या सरकारचा निषेध करतो. आम्हाला मागण्यापेक्षा अण्णांच्या जिवाची जास्त काळजी होती, असे राळेगणसिद्धीचे उपसरपंच लाभेश औटी यांनी  सांगितले.