अकोला : जिल्हा परिषद कृषी विभागाला आगामी आर्थिक वर्षात विविध योजना राबविता याव्यात यासाठी कृषी समितीने १० कोटी २१ लाख रुपयांचे अंदाजपत्रक शुक्रवारी (ता. २६) समितीच्या सभेत मंजूर केले आहेत.

कृषी विषय समितीची सभा कृषी व पशुसंवर्धन सभापती पंजाबराव वडाळ यांच्या अध्यक्षतेखाली झाली. समिती सदस्य अर्चना राऊत, संजय आढाऊ, अनंत अवचार, नीता गवई, दीपमाला दामधर, योगिता रोकडे आदी सदस्य उपस्थित होते. समितीचे सचिव तथा जिल्हा परिषद कृषी विकास अधिकारी डॉ. मुरली इंगळे यांनी सभेचे कामकाज सांभाळले. 

जिल्हा परिषदेच्या सेस फंडातून कृषी विभाग शेतकऱ्यांसाठी विविध योजना राबविते. सर्वसाधारण प्रवर्गातील शेतकऱ्यांना ताडपत्री पुरविण्यासह डिझेल पंप व ९० टक्के अनुदानावर इतर लाभ देण्याच्या योजनांचा समावेश आहे. दरम्यान, आर्थिक वर्ष २०२१-२२ मध्ये सुद्धा शेतकऱ्यांसाठी ९० टक्के अनुदानावर योजना राबविण्यासाठी जिल्हा परिषदेच्या कृषी समितीने शुक्रवारच्या सभेत १० कोटी २१ लाख रुपयांच्या अंदाजपत्रकास मंजुरी दिली. 

जिल्हा परिषद कृषी विभागामार्फत राबविण्यात येत असलेल्या बीटी बियाणे वाटप योजनेच्या लाभार्थ्यांकडून परिपूर्ण प्रस्ताव ५ फेब्रुवारीपर्यंत मागविण्यात आले होते. परंतु त्याला शेतकऱ्यांचा अपेक्षित प्रतिसाद मिळलेला नाही. त्यामुळे कागदपत्रांची पूर्तता करून बियाणे खरेदीचे

जीएसटी बिल प्रथम सादर करणाऱ्या लाभार्थी शेतकऱ्यांना प्राधान्य देऊन अनुदान देण्याचा ठराव कृषी समिती सभेने मंजूर केला आहे. त्यासाठी लाभार्थी १० मार्चपर्यंत त्रुटीरहित प्रस्ताव कृषी विभागात सादर करण्याचे आवाहनही केले आहे. या शिवाय जिल्हा परिषदेच्या कृषी विभागामार्फत राबविण्यात येत असलेल्या ६ योजनांसाठी अर्ज करणाऱ्या व निवड झालेल्या पात्र शेतकऱ्यांनी त्यांचे त्रुटी रहित प्रस्ताव ३१ मार्च पूर्वी पंचायत समिती स्तरावर सादर करावेत, असेही समितीने म्हटले आहे.