सोलापूर : सोलापूर जिल्हा परिषदेच्या कृषी विभागाच्या वतीने शेतकऱ्यांना देण्यात येणाऱ्या विविध कृषी साहित्याच्या वाटपाला अजूनही मुहूर्त मिळालेला नाही. गेल्या आठवड्यात झालेल्या बैठकीत यासंबंधी चर्चाही झाली; पण लाभार्थ्यांच्या प्रस्तावात त्रुटी असल्याचे कारण सांगत त्या दुरुस्तीसाठी आता हे वाटप आणखी काही दिवस लांबणीवर टाकण्याचा निर्णय या बैठकीत घेण्यात आला.

कृषी समितीचे सभापती मल्लिकार्जुन पाटील यांच्या अध्यक्षतेखाली ही बैठक झाली. बैठकीसाठी गणेश पाटील, अनिरुद्ध कांबळे, शुभांगी उबाळे, दिनकर नाईकनवरे आदी समितीचे सदस्य उपस्थित होते. या बैठकीत पहिला आणि महत्त्वाचा विषय कृषी साहित्य वाटप हा होता; पण या बैठकीत अक्कलकोट, माढा, माळशिरस आणि करमाळा या चार तालुक्‍यांतील शेतकऱ्यांच्या अर्जामध्ये अनेक त्रुटी आढळल्या आहेत.

या त्रुटी पूर्ण करून पुढील बैठकीमध्ये जिल्ह्यातील सगळ्याच प्रस्तावांना एकत्रित मान्यता देण्याचा निर्णय या वेळी झाला. त्यानंतर अन्य आयत्यावेळच्या विषयावर चर्चा झाली. त्याशिवाय रब्बी हंगामाचाही आढावा घेण्यात आला. कृषी विभागाच्या वतीने शेतकऱ्यांना पीक संरक्षक अवजारे, कडबाकुट्टी, डिझेलपंप, विद्युत मोटार यासाठी जवळपास ५ हजार ३०० लाभार्थ्यांचे अर्ज कृषी विभागाकडे आले आहेत.

त्या अर्जांची छाननी पुढील आठ-दहा दिवसांमध्ये करून पुढील बैठकीमध्ये साधारण १० -११ डिसेंबरला होणाऱ्या बैठकीत या प्रस्तावांना मान्यता देण्यात येणार असल्याचे सांगण्यात आले. त्यानंतर शेतकऱ्यांनी संबंधित साहित्याची खरेदी करून त्याची पावती कृषी विभागाकडे जमा करावी, त्यानंतर त्याचे पैसे शेतकऱ्यांच्या खात्यावर जमा होणार आहेत.