अमरावती  ः जिल्ह्यात खरीप व रब्बी हंगामात पिकांचे नुकसान होऊनही प्रधानमंत्री पीकविमा योजनेअंतर्गत विमा भरपाई देण्यास टाळाटाळ होत असल्याचा आरोप काँग्रेसकडून करण्यात आला आहे. याप्रकरणी वेळीच दखल घेत शेतकऱ्यांना भरपाई न मिळाल्यास तीव्र आंदोलन छेडण्याचा इशारा महाराष्ट्र प्रदेश काँग्रेस समितीचे सचिव आणि जिल्हा परिषद सदस्य प्रकाश साबळे यांनी दिला आहे.  जिल्हाधिकाऱ्यांमार्फत कृषिमंत्री दादा भुसे यांना या विषयावरील निवेदन पाठविण्यात आले आहे. दरम्यान, जिल्ह्यात खरीप व रब्बी हंगामात प्रधानमंत्री पीकविमा योजना राबविण्यात आली. तरी फेब्रुवारी महिना अखेरपर्यंत जिल्ह्यातील शेतकऱ्यांना पीकविमा योजनेअंतर्गत भरपाई मिळावी, अन्यथा प्रशासनाच्या विरोधात आंदोलन छेडण्याचा इशारा प्रकाश साबळे यांनी दिला आहे. आंदोलनामुळे निर्माण होणाऱ्या परिस्थितीला सर्वस्वी प्रशासन जबाबदार राहील, असेही निवेदनात नमूद करण्यात आले आहे.