औरंगाबाद : शेतकऱ्यांच्या विविध मागण्यांसदर्भात स्वाभिमानी शेतकरी संघटनेच्या वतीने शनिवारी (ता.२) विभागीय आयुक्‍तालयासमोर निदर्शने करण्यात आली. मागण्यासंदर्भात विभागीय आयुक्‍तांना निवेदनही सादर करण्यात आले.

स्वाभिमानी शेतकरी संघटनेचे नेते व वस्त्रोद्योग महामंडळाचे माजी अध्यक्ष रविकांत तुपकर यांच्या नेतृत्वातील केलेल्या या अांदोलनामध्ये जिल्हाध्यक्ष चंद्रशेखर साळुंखे, माउली मुळे, चंद्रकांत कटारे, मानिक कदम, विजय भंडे, विजय वैद्य, संपत रोडगे यांच्यासह स्वाभिमानी शेतकरी संघटनेचे कार्यकर्ते सहभागी झाले होते.

कपाशीवरील बोंड अळीच्या प्रादुर्भावामुळे नुकसान झालेल्या शेतकऱ्यांना हेक्‍टरी सव्वा लाख रुपये नुकसान भरपाई द्यावी, कपाशी बियाणे कंपन्यांवर कारवाई करण्यात यावी, उसाला पहिली उचल ३१०० रुपये देऊन एफआरपी प्रमाणे १४ दिवसांत पेमेंट देण्यात यावे, वीजबिल न भरणाऱ्या शेतकऱ्यांचे कट केलेले कनेक्‍शन पुन्हा जोडण्यात यावे, तशा सूचना महावितरण कंपनीला करावी, स्वामिनाथन आयोग लागू करून संपूर्ण शेतकऱ्यांची कर्जमुक्‍ती करण्यात यावी, अशी मागणी विभागीय आयुक्‍तालयाला दिलेल्या निवेदनातून करण्यात आली. कपाशीच्या किडलेल्या बोंडासह कपाशीची झाडे हाती घेऊन स्वाभिमानी शेतकरी संघटनेच्या कार्यकर्त्यांनी आपल्या मागण्यासंदर्भात घोषणाबाजी केली.