नांदेड : प्रादेशिक साखर सहसंचालक कार्यालयांतर्गंत नांदेड विभागातील चार जिल्ह्यांतील १३ पैकी ८ साखर कारखान्यांचे गाळप बंद झाले आहे. हे सर्व कारखाने परभणी, हिंगोली, नांदेड जिल्ह्यांतील आहेत. रविवार (ता. १५) पर्यंत नांदेड विभागातील साखर कारखान्यांनी २७ लाख ६७ हजार ६४१ टन उसाचे गाळप केले. सरासरी १०.७३ टक्के साखर उताऱ्याने एकूण २९ लाख ६९ हजार ९८५ क्विंटल साखर उत्पादन घेतले आहे.

रविवार  (ता.१५) पर्यंत ऊस गाळप हंगाम बंद झालेल्या कारखान्यांमध्ये परभणी जिल्ह्यातील २, हिंगोलीतील ३ आणि नांदेडमधील ३ साखर कारखान्यांचा समावेश आहे. 

नांदेड विभागातील चार जिल्ह्यांतील १७ साखर कारखान्यांना यंदाच्या हंगामात ऊस गाळपाचे परवाने मिळाले. परंतु १३ कारख्यान्यांनी ऊस गाळप सुरु केले. रविवार (ता.१५) पर्यंत परभणीतील ५ पैकी ३ खासगी कारखान्यांनी ६ लाख १६ हजार ४१४ टन उसाचे गाळप केले. सरासरी १०.८४ टक्के उताऱ्याने ६ लाख ६८  हजार ३६० क्विंटल साखर उत्पादन घेतले आहे. पूर्णा तालुक्यातील बळिराजा शुगर्सचा साखर उतारा सर्वाधिक ११.४४ टक्के एवढा आला. त्रिधारा शुगर्स आणि योगेश्वरी शुगर्स या दोन साखर कारखान्यांचे गाळप हंगाम बंद झाले आहेत.

हिंगोली जिल्ह्यातील ३ सहकारी  आणि १ खासगी अशा ४ साखर कारखान्यांनी ७ लाख ६७ हजार १०१ टन उसाचे गाळप केले. सरासरी १०.९२ टक्के उताऱ्याने ८ लाख ३७ हजार ८०० क्विंटल साखर उत्पादन घेतले. भाऊराव चव्हाण सहकारी साखर (युनिट २ )कारखान्याचा साखर उतारा सर्वाधिक ११.३ टक्के आला. पूर्णा सहकारी साखर कारखाना, टोकाई सहकारी साखर कारखाना, शिऊर शुगर्स या तीन साखर कारखान्यांचे ऊस गाळप बंद झाले आहे.

नांदेडमधील  ४ पैकी २ सहकारी, २ खासगी कारखान्यांनी ८ लाख ११ हजार ४१५ टन उसाचे गाळप करून सरासरी १०.६६ टक्के साखर उताऱ्याने ८ लाख ६४ हजार ८२५ क्विंटल साखर उत्पादन घेतले. लातूरमधील २ खासगी कारखान्यांनी ५ लाख ७२ हजार ७१० टन उसाचे गाळप केले. सरासरी १०.४६ टक्के उताऱ्याने ५ लाख ९९ हजार क्विंटल साखर उत्पादन घेतले. 

जिल्हानिहाय ऊसगाळप स्थिती