पुणे : कारखान्यांवरील गाड्यांची गर्दी, शेतकऱ्यांना उशिरा मिळणारे पैसे यावर नवीन तंत्रज्ञान शोधून तो लाभ तात्काळ कसा देता येईल, यावर तंत्रज्ञ उपाय शोधत आहेत. 'डीएसटीए'मध्ये मोठ्या प्रमाणात तंत्रज्ञ काम करत असून, त्यांनी पुढील ५० वर्षांच्या ऊसशेतीचे नियोजन केले तर फायद्याचे ठरेल. या दोघांमध्ये समतोल साधण्याची जबाबदारी साखर आयुक्तालयावर आहे, असे मत साखर आयुक्त शेखर गायकवाड यांनी व्यक्त केले. टेक्नॉलॉजी ट्रान्सफर असोसिएशन (टीटीए), वेस्ट इंडियन शुगर मिल्स असोसिएशन (डब्ल्यूआयएसएमए-विस्मा) आणि डेक्कन शुगर टेक्नलॉजीस्ट असोसिएशन (डीएसटीए) यांच्या संयुक्त विद्यमाने 'शुगरकेन टेक्नॉलॉजी'वर (ऊस तंत्रज्ञान) आयोजित चर्चासत्रात ‘उसाच्या पिकाचे नियोजन करण्यात खेतीबडी तंत्राचा वापर’ विषयावर गायकवाड बोलत होते. प्रसंगी 'टीटीए'चे यशवंत घारपुरे, विलास रबडे, 'विस्मा'चे सचिव अजित चौगुले, 'डीएसटीए'चे अध्यक्ष श्रीपाद गंगावती, 'खेतीबडी'चे मुख्य कार्यकारी अधिकारी विनय नायर, मुख्य वैज्ञानिक अधिकारी डॉ. रिचा पवार-नायर, मुख्य तंत्रज्ञान अधिकारी श्रीनिवासा रेड्डी आदी उपस्थित होते. शेखर गायकवाड म्हणाले, की महाराष्ट्रात ऊस क्षेत्र मोठ्या प्रमाणात आहे. त्यामध्ये वैविध्यपूर्ण उत्पादने घेण्याचा प्रयत्न झाला तर शेतकरी स्वयंपूर्ण होऊ शकतो. साखर उद्योगात नवनवीन तंत्रज्ञान येत असून, तंत्रज्ञानाचा वापर वाढला तर आपले शाश्वत शेतीचे उद्दिष्ट्य साध्य होईल. साखर व ऊस उत्पादक या दोघांनीही नावीन्यपूर्ण तंत्रज्ञानाचा वापर वाढवणे गरजेचे आहे. तसेच कारखाने आणि शेतकऱ्यांच्या संवादासाठी व्हिडिओ तंत्रज्ञान वापरावे. 'खेतीबडी' या नवतंत्रज्ञानाचा चांगला वापर करून घ्यावा. त्यासाठी त्यांनी कारखान्याशी करार करावेत. शेतकऱ्यांनी नियोजन करून ठरलेल्या कारखान्यांना योग्य वेळेत ऊस दिला, तर उत्पादन चांगले होऊ शकते.  विलास रबडे यांनी प्रास्ताविक केले. अजित चौगुले यांनी आभार मानले.