शिराळा, जि. सांगली : चांदोली धरण परिसरात गतवर्षाच्या तुलनेत सध्या ५.३८ टीएमसी कमी पाणीसाठा शिल्लक आहे. तरीही रब्बी हंगामाच्या सुरवातीपासूनच सातत्याने कृष्णा नदीवरील म्हैसाळ योजनेसाठी वारणा धरणातून पाणीपुरवठा केला जात आहे. सध्या ४.५० टीएमसी एवढे पाणी सोडण्यात आले आहे.

म्हैसाळला गत वर्षाच्या तुलनेत आत्तापर्यंत ४ टीएमसी ज्यादा पाणी देण्यात आले आहे. परतीचा पाऊस न झाल्याने म्हैसाळ योजनेला पाण्याची मागणी नेहमीपेक्षा लवकर करण्यात आली. गत वर्षाच्या तुलनेत ज्यादा पाऊस पडूनही साडेपाच टीएमसी पाणीसाठ्याची घट दिसून येत आहे. सध्या वाकुर्डे योजना सुरू झालेली नाही. त्यासाठी असणारा ५.२६ टीएमसी पाणीसाठा हा योजना पूर्ण क्षमतेने कार्यान्वित नसल्याने जास्त वापरला जात नाही. सध्या शिल्लक पाणीसाठा कृष्णा नदीवरील वापरासाठी सोडला जात आहे. रब्बी हंगाम संपत आला असून, उर्वरित शिल्लक पाणीसाठा उन्हाळी हंगामाकरिता वापरण्याचे नियोजन करण्यात आले आहे. 

या वर्षी परतीच्या पावसाने दोन महिने ओढ दिल्याने व कृष्णेची लवकर पाणी मागणी आल्याने वारणा धरणाच्या पाणीसाठ्यात गतवर्षाच्या तुलनेत साडेपाच टीएमसी घट झाली असून, या वर्षी धरण १०० टक्के भरलेच नाही. शिराळा तालुका हा अतिपावसाचा तालुका म्हणून ओळखला जातो. तालुक्याच्या पश्चिम भागातील वारणा धरण हे हमखास भरते. धरणात अतिरिक्त साठा होऊ नये व धरण सुरक्षिततेच्या दृष्टीने धरणातून पाणी सोडले जाते. सप्टेंबर, ऑक्टोबरला येणाऱ्या परतीच्या पावसामुळे दोन ते चार टीएमसी वाढ होते. हा धरण प्रशासनाचा अनुभव आहे. दहा ऑक्टोबरपासून वारणा धरणातून पाणी सोडण्यास सुरवात झाली. त्यानुसार कृष्णेला ४.५० टीएमसी पाणी देण्यात आले. गतवर्षी २३४५ मि.मी पाऊस पडला होता. या वर्षी २९४० मीमी म्हणजे गेल्या वर्षीपेक्षा ९५ मि.मी जास्त पडला. 

वारणेच्या पाण्याचे मंजूर पाणीवापर नियोजन (टीएमसीमध्ये)