मळेगाव, जि. सोलापूर  ः दीड वर्षांपूर्वी भीषण दुष्काळाला सामोरे गेलेल्या बार्शी तालुक्यातील ४३ हजार शेतकऱ्यांना २०१८-१९ मधील दुष्काळ निधी अद्यापही मिळालेला नाही. त्यामुळे अडचणीत आलेल्या शेतकऱ्यांनी आता विभागीय आयुक्त सौरभ राव यांच्याकडे धाव घेत निवेदन दिले आहे.  

राव यांची पुण्यात नुकतीच भेट घेत या प्रश्नी राहुल भड, भास्कर काकडे, सतिश यादव, मोहन दराडे या शेतकऱ्यांनी हे निवेदन दिले.  कोरोनामुळे बंद झालेल्या बाजारपेठा, शेतमालाचे गडगडलेले भाव, हाताला काम नाही, कुटूंबाचा उदरनिर्वाहाचा प्रश्न, यामुळे शेतकरी मोठ्या आर्थिक संकटात सापडला आहे.

सन २०१८-१९ पडलेल्या भीषण दुष्काळात शेतकऱ्यांना आर्थिक आधार देण्यासाठी शासनाने दुष्काळ निधी मंजूर केला. त्याचे वितरणही झाले. बार्शी तहसिल कार्यालयामार्फत ४५ हजार ७८ खातेदारांना ३८ कोटी ५६ लाख ९७ हजार दुष्काळ अनुदान वाटप करण्यात आले. पण, त्याशिवायही तालुक्यातील आणखी ४३ हजार शेतकरी अद्यापही दुष्काळी अनुदानाच्या प्रतीक्षेत आहेत. 

शेतकऱ्यांनी वारंवार तहसिल आणि जिल्हाधिकारी कार्यालयाकडे पाठपुरावा केला. पण, कोणतीच दखल घेतली गेली नाही.